Kơxê lơ 22/5, pôa Võ Văn Thưởng, Kăn xiâm hnê ngăn Tơnêi têa hiăng tơdah Kăn hnê ngăn Đảng Tơnêi têa Rusi Môi tuăn, Kăn phŏ hnê ngăn Hô̆i đong Gâk kring kong têa Rusi cho pôa Dmitry Medvedev. Pôa Võ Văn Thưởng, Kăn xiâm hnê ngăn tơnêi têa tối nhên ki pơxúa rôh lăm pôu Việt Nam rôh kố dêi khu kăn kố cho rôh vâ péa pâ rơtế tơpui tơno ‘na mâu troăng pơkâ tơmiât tơrŭm cheăng Việt Nam – Rusi, tung mê, ai tơrŭm cheăng pơla péa Đảng, péa Tơnêi têa.

Péa ngế kăn pơkuâ hiăng môi tuăn tung la ngiâ kô pơtối mơdêk trâm mâ tơpui tơno ‘na mơhno túa lĕm tro, trâm mâ kuăn pơlê; mơdêk hnoăng cheăng dêi mâu tơrŭm tơroâ pơla péa tơnêi têa, vâ mơdêk hlê plĕng, xuân môi tiah rak vế mâu tơdroăng ki kơnía tơniăn lĕm dêi tơrŭm cheăng tiah hmâ ƀă ki hiăng ton 75 hơnăm.

Kăn xiâm hnê ngăn tơnêi têa xuân mơnê ƀă pơkâ thế kong têa Rusi pơtối tơmâng ngăn, pro tơ’lêi hlâu ăm kuăn pơlê Việt Nam a Rusi rêh ối, pêi cheăng kâ, hriâm tâp ton xŏn ƀă tơniăn.