Kơxo lơ 5/6, a Tíu pêi cheăng kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa tơdah pôa Marc Evans Knapper, Kăn teăng mâ pơkuâ tâi tâng Mih a Việt Nam. A rôh tơdah, pôa Võ Văn Thưởng, kăn xiâm hnê ngăn tơnêi têa mơnhên tối khât kơ kăn teăng mâ tung pơla hdrối nah hiăng ai mâu rôh pêi cheăng ƀă mâu kơ koan ki ai tơdjâk troh dêi Việt Nam; lăm pôu hên kong pơlê vâ mơdêk tơrŭm cheăng pơla péa tơnêi têa rế hía rế prôk trâu hngế ƀă tơƀrê.

Kăn teăng mâ tối nhên, Mih kố pơtối tơrŭm krá tơniăn ƀă Việt Nam tung tơdroăng ‘mâi mơnhông mâu tơdroăng klêi plâ tơplong, tung mê ai tŏng kum mâu ngế ki tro tơdjâk trếo ‘mêi dioxin, hrik xo ƀom mìn ƀă tí tăng mâu ngế hía klêi kơ’nâi tơplâ. Vâ pơtối pêi trâu rơdâ tâ tơrŭm cheăng pơla Việt Nam – Mih tung la ngiâ ah, kăn xiâm hnê ngăn tơnêi têa pơkâ thế péa pâ mơdêk tâ nếo mâu tơdroăng ki pơtroh mâu khu râ kăn, trâm mâ khu râ kăn ƀă rêm râ; pơkâ mơdêk hên tâ nếo mâu tơdroăng tơkêa tơrŭm cheăng pơla péa pâ tung mâu kơvâ cheăng, pro pơxúa ăm tá péa tơnêi têa, tơdrêng amê hlối veăng kum tơƀrê ăm hơniâp lĕm, tơniăn, tơrŭm ƀă mơnhông mơdêk a kơpong ƀă tung lâp plâi tơnêi.