Kơxê lơ 19/6, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa tơdah Khu râ kăn xiâm Hngêi tơleăng xiâm kong têa Rusi xua pôa Lebedev Vyacheslav Mikhailovich, Kăn xiâm pơkuâ hngêi tơleăng, pơkuâ djâ dế ai roh lăm pôu ƀă pêi cheăng a Việt Nam. A roh tơdah, pôa Võ Văn Thưởng mơnhên, Việt Nam đi đo nhuô̆m tơrŭm cheăng ton xŏn ƀă kong têa Rusi, ngăn kố cho khu tơrŭm cheăng má môi. Việt Nam pói vâ thăm tơrŭm cheăng Việt Nam – Rusi rế hía rế prôk trâu hơngế ƀă châ tơƀrê, tơxâng ki pơxúa păng ‘nâng dêi péa hdroâng mơngế, xua hơniâp lĕm, tơniăn ƀă mơnhông kơpong ƀă lâp plâi tơnêi.

Kheăn kơdeăn tơdroăng châ tơƀrê tơrŭm cheăng lĕm tro dêi kơvâ Hngêi tơleăng péa tơnêi têa, pôa Võ Văn Thưởng môi tuăn tơdroăng péa kơ koan rak tơpui tơno pơla khu; tơrŭm tung tơdroăng pêi cheăng; rak mơnhên tơdroăng châ tơƀrê tơrŭm cheăng rêm hơnăm ƀă tơ’nôm mâu tơdroăng tơrŭm nếo tiô troăng ki pơxúa ƀă châ tơƀrê tâ. Kăn xiâm hnê ngăn tơnêi têa loi tơngah tung la ngiâ, kơvâ Hngêi tơleăng péa tơnêi têa kô pơtối thăm tơrŭm tâ mê nếo; veăng kum hên tung tơdroăng mơnhông mơdêk dêi rêm kong têa, xuân môi tiah thăm krá tơniăn tơrŭm cheăng tiô khôi vâi krâ nah pơla péa tơnêi têa.