Kơxê hâi lơ 17/5, a Tíu pêi cheăng dêi Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa hiăng tơdah pôa Jadamba Enkhbayar, Ngế chêh tôm xo rơkong dêi Hô̆i đong Kring vế tơniăn tơnêi têa Mông Cổ ƀă Khu kăn ai rôh lăm pôu ƀă pêi cheăng a Việt Nam. Khĕn kơdeăn khât pôa Jadamba Enkhbayar ƀă Khu kăn ‘na tơdroăng tối vâ tơrŭm cheăng, pôa Võ Văn Thưởng tối Kăn xiâm hnê ngăn tơnêi têa tối nhên, Việt Nam ƀă Mông Cổ cho péa tơnêi têa pú hmâ sap ing nah, kuăn pơlê péa tơnêi têa hmâ ƀă dêi rơpó sap ing nah. Vâ chê 70 hơnăm hdrối, tơdroăng tơrŭm cheăng pơla péa tơnêi têa ôh tá la lâi pơtê mơnhông mơdêk rơdêi.

A rôh tơdah, pôa Võ Văn Thưởng tối tiah kố, ing tơdroăng pêi pro tơƀrê mâu tơdroăng kal ‘na tơrŭm cheăng pơla péa pâ, péa tơnêi têa kô rơtế mơ-eăm mơdêk ki tơrŭm cheăng tung tŭm tơdroăng tơrŭm hên tâ tung la ngiâ. Vâ tơƀrê tơdroăng pơkâ pêi mê, Kăn xiâm hnê ngăn tơnêi têa pâ thế péa pâ mơdêk rơdêi mâu tơdroăng tơpui tơno tơrá mâu kăn a Tíu xiâm ƀă kong pơlê; ing mê mơdêk hlê plĕng dêi rơpó, loi nhoăm dêi rơpó; tơbleăng pêi mâu troăng hơlâ vâ bro tơ’lêi hlâu tâ nếo ăm tơdroăng trâm mâ, lăm pôu dêi rơpó pơla kuăn pơlê péa tơnêi têa.