A rôh tơdah, pôa Võ Văn Thưởng, Kăn xiâm hnê ngăn tơnêi têa phiu ro hlo tơrŭm cheăng khôi hmâ ƀă tơrŭm cheăng tơniăn lĕm pơla péa tơnêi têa pơtối mơnhông tơƀrê. Péa pâ pơtối rak vế pơtroh mâu khu râ kăn lăm troh a tơnêi têa dêi rơpó ƀă trâm mâ pơla mâu kăn xiâm pơkuâ rêm râ.

Tơrŭm cheăng kâ, tê mơdró, ‘no liăn cheăng pơla péa pâ mâu mơnhông tơƀrê khât. Drêng kố, Kăn xiâm hnê ngăn tơnêi têa loi nhuô̆m mơnê Kong têa Ƀih prếi UNICEF Ƀih, xuân môi tiah kơdrâi pơtáu cho Mathilde hiăng đi rơtế prôk, tŏng kum ƀă tơrŭm cheăng ƀă Việt Nam tung kơvâ cheăng rak vế ƀă tŏng kum vâi hdrêng; kum hên kơxô̆ liăn ki kal ăm Việt Nam tung tơdroăng mơdêk tơƀrê tŏng kum vâi hdrêng.

Mơnhên tối khât mâu tơdroăng ki pâ thế dêi kơdrâi pơtáu ƀă Khu kăn, Kăn xiâm hnê ngăn tơnêi têa pin rơhêng vâ UNICEF Ƀih pơtối tŏng kum Việt Nam pêi klêi tơdroăng tŏng kum, luât tơdjâk troh vâi hdrêng; pơtối kum liăn ăm Việt Nam, malối cho ‘na mâu kơvâ cheăng hnê hriâm, khăm pơlât vâ Việt Nam pêi pro tro tâ tơdroăng ki pơlât, hnê hriâm vâi hdrêng tung la ngiâ.