Kơxê lơ 24/5, tơdah mâu kăn teăng mâ mâu kong têa Qatar Brazil, Slovenia, Bồ Đào Nha, Estonia ƀă Guinea lăm pơtroh kơthô xo hnoăng cheăng a Việt Nam, pôa Võ Văn Thưởng, Kăn xiâm hnê ngăn tơnêi têa tối nhên, mâu kơ koan ki ai tơdjâk troh dêi Việt Nam kô pro tơ’lêi hlâu vâ mâu kăn teăng mâ mơdêk tơrŭm cheăng pơla péa pâ ƀă Việt Nam rế hía rế mơnhông rơdêi.

Tơdah kăn teăng mâ Qatar cho pôa Khalid Ali Abdullah Abel, Kăn xiâm hnê ngăn tơnêi têa phiu ro ‘na tơrŭm cheăng tơrŭm tơroâ pơla péa tơnêi têa mơnhông tơƀrê, hmâ pơtroh mâu khu râ kăn lăm troh a tơnêi dêi rơpó, a chê kố cho rôh lăm pôu păng ‘nâng Qatar dêi jâ Võ Thị Ánh Xuân, Kăn xiâm phŏ hnê ngăn tơnêi têa a khế 5/2023.

Kăn xiâm hnê ngăn tơnêi têa pơkâ thế kăn teăng mâ tung hneăng pêi cheăng dêi tơná mơdêk tơrŭm cheăng pơla péa tơnêi têa ‘na mâu tơdroăng cheăng ƀă tối rơhêng vâ rĕng tơdah pôa Sheikh Tamim bin Hamad Al-Thani, pơtáu kong têa Qatar lăm pôu Việt Nam tung hơnăm 2023. Tơdah pôa Marco Farani, kăn teăng mâ Brazil, pôa Võ Văn Thưởng tối rơdêi Việt Nam đi đo ngăn nhuô̆m ƀă rơhêng vâ mơdêk tâ nếo tơrŭm tung tâi tâng kơvâ cheăng ƀă Brazil.

A rôh tơdah, pôa Võ Văn Thưởng mơnê ƀă mơnhên tối mâu kong têa hiăng môi tuăn ƀă tuăn tơmiât dêi ASEAN ƀă Việt Nam ‘na Biển Đông, pơkâ tơleăng mâu tơdroăng ki tơbriât ƀă mâu tơdroăng ki hơniâp lĕm loi nhuô̆m luât, malối cho UNCLOS 1982, rak vế gâk kring, tơniăn krê a têa kơxĭ ƀă a hbo plêng; rak vế hơniap lĕm, tơniăn ƀă mơnhông tung kơpong.