Kơxê hâi lơ 20/4, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa tơdah pôa Thongsavanh Phomvihane, ngế xiâm tơpui kâ Tíu xiâm Đảng Nhân yân Kăch măng Lếo. Koh tơdah pôa Thongsavanh Phomvihane rôh apoăng lăm pôu Việt Nam tung hnoăng cheăng nếo, pôa Võ Văn Thưởng, Kăn xiâm hnê ngăn tơnêi têa tơngah, rôh lăm pôu kố kô mơdêk rơdêi tơrŭm cheăng pơla péa Khu xiâm tơpui kâ péa Đảng; veăng kum mơdêk tâ nếo ki tơƀrê tơrŭm cheăng tung tâi tâng pơla péa Đảng péa tơnêi têa tung la ngiâ.

Ngế xiâm tơpui kâ Tíu xiâm Đảng Nhân yân Kăch măng Lếo ăm ‘nâi, péa kơ koan athế đi đo tơkŭm po mâu tơdroăng ki pơtroh mâu kăn lăm pôu dêi rơpó; môi tuăn ƀă túa pơkâ pêi cheăng, tơrŭm tung hơnăm 2023 ƀă rơtế tơpui tơno mâu tơdroăng ki péa pâ rơtế vâ ‘nâi plĕng xuân môi tiah pơkâ troăng tơrŭm cheăng tung la ngiâ ki pơtối.

Kăn xiâm hnê ngăn tơnêi têa pin pơkâ thế péa Khu xiâm tơpui kâ péa Đảng kal thăm mơdêk tối ăm dêi rơpó ki rơkê tung tâi tâng mâu kơvâ cheăng ƀă hiâm mơno tơrŭm tung tơdroăng cheăng ƀă tơrŭm krá ‘na nhŏng o; pơtối tối ăm dêi rơpó ki rơkê ƀă tŏng kum dêi rơpó tung mâu rôh hôp kơpong ƀă lâp plâi tơnêi.