Kơxê lơ 25/5, pôa Võ Văn Thưởng, Kăn xiâm hnê ngăn tơnêi têa hiăng trâm mâ 75 ngế droh rơtăm ki kơhnâ rơkê pêi pro tiô rơkong Pôa hnê dêi Đảng ủy Khô̆i mâu kơ koan Tơnêi têa. Kố cho mâu ngế ki djâ kơhnâ rơkê tung hriâm tâp, pêi pro tiô rơkong pôa Hồ Chí Minh, ai ivá veăng kum tơxâng tung hnoăng cheăng Đoân ƀă tơdroăng pêi pro mâu tơdroăng cheăng dêi droh rơtăm mâu phô̆m vâ xông kân, châ vâi lo tơngah ƀă tơdjâk kơhnâ tung đoân viên, droh rơtăm Khô̆i mâu kơ koan Tơnêi têa.

Pôa Võ Văn Thưởng, Kăn xiâm hnê ngăn tơnêi têa rơkâu, khĕn kơdeăn mâu droh rơtăm ki pêi pro klêi mâu tơdroăng tung pơla hdrối kố nah, tơdrêng amê hlối tối nhên ‘na ki kal dêi droh rơtăm Khô̆i mâu kơ koan Tơnêi têa tối krê, droh rơtăm tung lâp tơnêi têa tối tơdjuôm tung tơdroăng cheăng mơjiâng ƀă rak vế Tơnêi têa. Kăn xiâm hnê ngăn tơnêi têa rơhêng vâ mâu đoân viên droh rơtăm maluâ ối a tíu lâi xuân athế pêi pro tro hnoăng cheăng dêi tơná ƀă hnoăng cheăng pôu râng ƀă ki rơkê plĕng má môi vâ kum kuăn pơlê, tơxâng cho droh rơtăm ki kơhnâ rơkê.