Kơxê lơ 28/6, pôa Võ Văn Thưởng, Kăn xiâm hnê ngăn tơnêi têa ƀă mâu kăn teăng mâ Kuô̆k hô̆i Pơlê kong kân Đà Nẵng trâm mâ kuăn pơlê pơlê kong kân, tối tơbleăng tơdroăng châ tơƀrê hneăng hôp má 5, Kuô̆k hô̆i má XV. Kăn xiâm hnê ngăn tơnêi têa kheăn kơdeăn kuăn pơlê pơlê kong kân tối mâu tơdroăng nếo ai, cho ing hnoăng cheăng, tơdroăng ki tá hiâm mơno ƀă tơxâng ƀă tơdroăng mơnhông pơlê kong kân ƀă tơnêi têa.

A roh tơdah trâm mâ, kuăn pơlê kheăn kơdeăn Kuô̆k hô̆i ai hneăng hôp châ tơƀrê, mơhnhôk ƀă tơxâng tơdroăng tơmâng tŏng kum dêi kuăn pơlê, tung mê ai tơdroăng veăng kum dêi khu râ kăn teăng mâ Kuô̆k hô̆i pơlê kong kân Đà Nẵng. Kuăn pơlê tối mâu tơdroăng tơmâng nôkố cho kal thăm pơtâng tối troăng hơlâ ƀă mâu ki kơnâ lĕm tro dêi pơlê pơla hên tâ mê nếo; pơtối pơkâ thế Đảng, Tơnêi têa thăm pêi pro rơdêi tơdroăng hbrâ mơdât kâ kơhveăm liăn ngân, tơdroăng ki ôh tá lĕm tro, mơ’nhê tê kơtê; mâu tơdroăng pơloăng mơnúa tung pêi pro mâu troăng pơkâ pêi ki phá tơ-ê a pơlê kong kân Đà Nẵng ƀă hía hé.

Hdrối mê, klăng roh Hâi Rơpŏng Việt Nam 28/6, pôa Võ Văn Thưởng hiăng troh lăm pôu rơpŏng Thái hnê hriâm dêi kuăn pơlê Nguyễn Trọng Hoàng.