Kơxo lơ 30/5, a tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa trâm mâ 70 ngế ki ai hnoăng cheăng kong pơlê Vĩnh Long cho mâu mố đô̆i tro rong, mố đô̆i châi tamo, ngế ki tro kroăng phâk, ngế ki tro trếo ‘mêi dioxin, nhŏng o mâu mố đô̆i ki hlâ ƀă rơpŏng hngêi ngế ki ai hnoăng.

Troh nôkố, lâp kong pơlê Vĩnh Long ai 16 rơpâu ngế mố đô̆i hlâ, 4.500 ngế tro rong ƀă châi tamo, vâ chê 3 rơpâu ngế Jâ Nôu Việt Nam khên tơnôu. Kăn xiâm hnê ngăn tơnêi têa rơhêng vâ ngế ki ai hnoăng a kong pơlê Vĩnh Long pơtối mơdêk khôi hmâ hâk tơngăm dêi pơlê xiâm pơtối veăng kum hnoăng, veăng kum ivá tung mơnhông mơdêk pơlê xiâm Vĩnh Long khên tơnôu. Tơpui a rôh trâm mâ, kăn xiâm hnê ngăn tơnêi têa khĕn kơdeăn hên ngế ki ai hnoăng ƀă rơpŏng hngêi vâi hiăng tơkâ luâ mâu tơdroăng ki châi heăng, xơpá, mơdêk hiâm mơno mơ-eăm tung rêh ối, mơjiâng túa rêh ối lĕm tro rơkê plĕng a kong pơlê.

Mâu kăn maluâ hơnăm hiăng hên, ivá ôh pá hro xếo, xuân ối pơtối veăng kum ăm pơlê xiâm, tơnêi têa, hnê hriâm, hnê tơ’nôm hiâm mơno ăm mâu rơxông hơnăm ối nếo. Kăn xiâm hnê ngăn tơnêi têa rơhêng vâ hiâm mơno kố pơtối châ rak vế, mơdêk tung tâi tâng khu ngế ki ai hnoăng tung lâp tơnêi têa, veăng kum mơjiâng pơlê xiâm, tơnêi têa rế hía rế kro mơdrŏng.