Kơxo lơ 14/6, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa trâm mâ, khĕn kơdeăn 140 ngế ki kơhnâ rơkê tung hbrâ mơdât pâk chik xúa trếo ma tŭi tung lâp tơnêi têa ƀă teăng mâ mâu nhŏng o dêi 28 ngế hlâ tung hnoăng cheăng hbrâ mơdât pâk chik xúa trếo ma tŭi. Rôh trâm mâ po tung pơla drêng mâu kăn veăng ai mâ a tơdroăng Ô eăng mâu ngế ki kơhnâ rơkê xua Khu xiâm ngăn Kŏng an tơkŭm po ƀă pêi pro Khế hbrâ mơdât pâk chik xúa trếo ma tŭi khế 6/2023.

Tơpui a rôh trâm mâ, kăn xiâm hnê ngăn tơnêi têa khĕn kơdeăn ivá mơ-eăm, mâu hnoăng cheăng, pêi pro rơkê ki mâu khu lêng hiăng pêi châ tung pơla hdrối nah, malối cho ƀă 140 ngế pú hên, ngế krê ki kơhnâ rơkê, khu lêng kuăn pơlê ai hên tơdroăng veăng kumn tung hbrâ mơdât pâk chik xúa trếo ma tŭi a rôh trâm mâ, Kăn xiâm hnê ngăn tơnêi têa tối tiah kố, kố cho mâu ngế ki djâ troăng ahdrối, mâu ngế ki kal veăng kum bro ăm hnoăng cheăng hbrâ mơdât pâk chik xúa trếo ma tŭi rế hía rế tơƀrê tâ nếo.

Kăn xiâm hnê ngăn tơnêi têa xuân rơhêng vâ rế hía rế ai tơ’nôm hên kuăn pơlê veăng tơrŭm rơtế ƀă mâu khu lêng ki ai tơdjâk troh, tơdjuôm ivá “xua môi pơlê pơla ôh tá pâk chik trếo ma tŭi”, djâ ăm mâu kuăn ‘nĕng ki pro ôh tá tro ai rôh vâ châ tơrŭm ƀă pơlê pơla.