Peăng xêi hâi lơ 30/6, a tíu pêi cheăng Kăn xiâm hnê ngăn tơnêi têa pôa Võ Văn Thưởng, Kăn xiâm hnê ngăn tơdah jâ Oh Youngju, Kăn teăng mâ Hàn Quốc a Việt Nam troh koh pơ’lâng. Pôa Võ Văn Thưởng rơkâu kơ jâ Oh Youngju hâk phiu xua hiăng châ tơdah xo hnoăng cheăng ki nếo; loi tơngah ƀă pói rơhêng vâ jâ Oh Youngju kô pơtối tŏng kum ƀă thăm mơdêk hên tâ nếo tơrŭm cheăng ki krá tơniăn ton tung tŭm kơvâ cheăng pơla Việt Nam ƀă Hàn Quốc tung la ngiâ. Kăn xiâm hnê ngăn tơnêi têa hiăng hâk kơdeăn kân kơ jâ Oh Yongjju hiăng pêi pro klêi hnoăng cheăng tơná a Việt Nam, hiăng ai mâu tơdroăng cheăng ki kal tung hnoăng veăng mơdêk tơrŭm cheăng pơla péa pâ tơnêi têa, ki rơhêng vâ tối veăng pêi pro 2 tơdroăng cheăng ki kân: Kăn xiâm hnê ngăn tơnêi têa Việt Nam lăm pôu Hàn Quốc a mơ’nui hơnăm 2022 ƀă hneăng lăm pôu râ tơnêi têa troh a Việt Nam dêi Kăn xiâm pơkuâ ngăn kong têa Hàn Quốc nếo achê pơla kố nah.

A chôu phut tơdah mê, jâ Oh Youngju hiăng vêh tơbâ nếo rơkong krếo thế dêi pôa Yoon Suk -yeol, Kăn xiâm pơkuâ kong têa Hàn Quốc tung roh trâm mâ a Hà Nội, krếo thế pôa Võ Văn Thưởng ƀă kơdrâi pôa rĕng lăm pôu troh a kong têa Hàn Quốc. Kăn xiâm hnê ngăn tơnêi têa pin hiăng hơniâp ro, tiâ hôm ƀă tối ăm ‘nâi, hneăng lăm pôu kô châ rah xo a hâi ki tơtro.