VOV4.Xơ Đăng - Kơxo lơ 14/9, a pơlê kong kơdrâm Nha Trang, Khu kăn ki pêi dêi hnoăng cheăng dêi Chin phuh xua pôa Vũ Đức Đam, Ngế pro xiâm phŏ hnê ngăn tơnêi têa pơkuâ djâ khu kăn kố hiăng pêi cheăng ƀă Vi ƀan hnê ngăn kong pơlê Khánh Hòa ‘na mau tơdroăng cheăng ki kal dêi mâu kơvâ cheăng ki ối tung kơvâ khoa hok – pơlê pơla. Tơpui a rôh pêi cheăng, pôa Vũ Đức Đam mơnhên tối khât tơdroăng ki pêi pro hnoăng cheăng khoa yăo – văn xah dêi kong pơlê Khánh Hòa.

Pôa Vũ Đức Đam, Ngế pro xiâm phŏ hnê ngăn Chin phuh pêi cheăng ƀă kong pơlê Khánh Hòa

Malối cho hnoăng cheăng hbrâ mơdât pơreăng COVID-19. Ngế pro xiâm phŏ hnê ngăn tơnêi têa ăm ‘nâi la ngiâ ah, Khu xiâm ngăn pơkeăng ƀă khăm pơlât kô hnê mơhno ‘na tơdroăng pơkâ tro, kơlo pơkâ vâ kong pơlê ‘no liăn mơjiâng pro tíu khăm pơlât Tíu xiâm séa ngăn châi tamo.Mâu hngêi pơkeăng ki má mơ’nui dêi Khu xiâm ngăn pơkeăng ƀă khăm pơlât tŏng kum kong pơlê pro Hngêi pơkeăng kân kong pơlê.

‘Na tơdroăng ki hơ’lêh kơxô̆, Khu ngăn tơdroăng pơtâng tối tơdroăng kal tiô hyôh um tơvi veăng tí tăng ‘nâi plĕng ăm kong pơlê pơkâ mơ’no mâu tơdroăng pêi pro ai pơxúa, nhên tung mơjiâng khu kăn pơkuâ điê̆n tưh kum ăm kuăn pơlê.

Katarina Nga tơplôu ƀă tơbleăng