Hâi lơ 27/12, pôa Vũ Đức Đam, Ngế pro xiâm phŏ hnê ngăn tơnêi têa pơkuâ roh hôp Khu hnê mơhno kơvâ cheăng tơnêi têa ‘na mơgrúa tơniăn lĕm kế kâ. Tơbleăng dêi Khu xiâm pơkuâ ngăn pơkeăng ƀă khăm pơlât ăm hlo, hơnăm 2022, luât ‘na rak tơniăn kế kâ pơtối châ kêi đeăng; tơdroăng pơtâng tối pơtối thăm pêi pro rơdêi; hlê plĕng pêi pro luât dêi mâu tíu mơjiâng pro rế hía rế châ tơtêk. Laga, klêi kơ’nâi tơdroăng séa ngăn, xuân châ hlo chât rơpâu tíu pro xôi, hiăng pơxâu phâk lối 7.600 tíu, ƀă tâi tâng kơxô̆ liăn pơxâu phâk lối 75 rơtal liăn.

Xông tơpui mơgêi a roh hôp, pôa Vũ Đức Đam, Ngế pro xiâm phŏ hnê ngăn tơnêi têa pơkâ Khu xiâm pơkuâ ngăn pơkeăng ƀă khăm pơlât pơtối thăm pêi pro rơdêi tơdroăng séa ngăn, a mâu kơchơ, tơmeăm ối drêh, ối rêh vâ châ hlo mâu tơmeăm ki ôh tá krúa lĕm, tơrŭm ƀă mâu troăng vâ séa ngăn châ hlo rĕng mâu tơmeăm ki ôh tá tơniăn krúa lĕm vâ tối tơbleăng rĕng má môi.