VOV4.Xơ Đăng - Kơxê lơ 25/7 a tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn tơnêi têa, Tôh trương tôh pêi cheăng kơxô̆ 3 ‘na séa ngăn, hnê tối, lêi tah tơdroăng pá, mơdêk thế châ xo liăn ngăn vâ ‘no pêi cheăng mơjiâng tơmeăm khoăng tơnêi têa hơnăm 2022 hiăng pêi cheăng ƀă 17 khu xiâm, kơ koan xiâm tơnêi têa, 2 kong pơlê Cao Bằng, Bắc Kạn ‘na ki rơkê plĕng tung tơdroăng xo liăn ngân ‘no mơjiâng tơmeăm khoăng tơnêi têa.

Riân troh hâi lơ 30/5, tối ‘na tơdroăng xo liăn ngăn dêi 17 khu xiâm kơvâ cheăng dêi Tôh pêi cheăng kơxô̆ 3 châ dâng 1.585 rơtal liăn, châ 8, 77% tiô pơkâ ƀă iâ tâ kơlo riân tơchoâm dêi lâp tơnêi têa. Riân troh lơ 22/7, kong pơlê Cao Bằng xo liăn ngân tơnêi têa vâ mơjiâng tơmeăm khoăng châ lối 20%; kong pơlê Bắc Kạn châ lối 22%. Ki xiâm tơdjâk troh tơdroăng xo liăn vâ ‘no mơjiâng tơmeăm khoăng tơnêi têa mê xua pơ’lêh luât pơkâ, luât tŏng kum ‘na pêi pro tiô hlá mơ-éa tơhrâ, tơdroăng tơkêa bro ODA; xua yă mơ-eăm mơjiâng pro to kơnâ, hnoăng mơngế pro....

Mơgêi rôh hôp, pôa Vũ Đức Đam, Ngế pro xiâm hnê ngăn tơnêi têa pơkâ thế pơtối mơdêk tăng liăn ngân tơnêi têa ‘no mơjiâng pro tơmeăm khoăng tơnêi têa, tiô tối hdrối kô pê klêi a mơ’nui hơnăm; troăng pơkâ tối ai liăn thế châ mung. Ƀă mâu tơdroăng tơkêa bro ki lâi hiăng pro klêi hlá mơ-éa mê ôh tá tơvêh, pakĭng mê, tung pơla tơvêh mâu ngế pơkuâ ‘no liăn cheăng dêi mâu kơ koan xuân thế pơtối tơbleăng, drêng mâu hlá mơ-éa hiăng pro tŭm thế pơtối tơbleăng pêi, tâng hiăng tŭm hlá mơ-éa pro mê kô pro ăm nếo.

Gương tơplôu ƀă tơbleăng