VOV4.Xơ Đăng - Kơxo lơ 5/9, veăng tung tơdroăng ki phiu ro, mơngiơk lĕm dêi hlá cơ reăng dêi Hâi mơdĭng tâi tâng kuăn pơlê djâ kuăn ‘nĕng troh hngêi trung, thái cô Hngêi trung râ má môi Trung Tự (pơlê krâm Đống Đa, Hà Nội) phiu ro tơdah pôa Vũ Đức Đam, Ngế pro xiâm phŏ hnê ngăn Chin phuh troh veăng a leh pơxiâm mot hơnăm hriâm nếo 2022 – 2023. Hngêi trung Râ má môi Trung Tự nôkố ai lối 1 rơpâu 700 ngế hok tro ƀă 38 to lâm hriâm, tung mê ai 1 to lâm hriâm tơrŭm ăm mâu vâi muăn kuăn ‘nĕng ki chó chêng, tơvê kŏng ƀă hên ki ê.

Pôa Vũ Đức Đam, Ngế pro xiâm phŏ hnê ngăn tơnêi têa veăng a leh pơxiâm mot hơnăm hriâm nếo a Hngêi trung râ má môi Trung Tự - Hà Nội

Klêi kơ’nâi veăng a leh pơxiâm mot hơnăm hriâm nếo ƀă lăm pôu ngăn mâu kế tơmeăm xúa dêi hngêi trung râ má môi Trung Tự, pôa Vũ Đức Đam rơhêng vâ, tơdroăng ki hnê hriâm dêi Hngêi trung Trung Tự châ po rơdâ hên mâu hngêi trung ki ê; tơdrêng amê hlối pơkâ thế kăn pơkuâ pơlê krâm Đống Đa pơtối tơmâng ngăn, pro tơ’lêi hlâu tâ nếo vâ mâu hngêi trung hriâm a pơlê krâm pơtối tơbleăng hnê tơrŭm ăm vâi hdrêng ki chó chêng tơvê kŏng.

Katarina Nga tơplôu ƀă tơbleăng