Tung rôh lăm pôu kong têa Kŏng hòa Đông Uruguay, kơxo hâi lơ 27/4 (tiô chôu kong têa kố) pôa Vương Đình Huệ, Kăn xiâm hnê ngăn Kuô̆k hô̆i hiăng tơpui tơno ƀă Kăn xiâm pơkuâ kong têa Luis Lacalle Pou. A rôh tơpui tơno Kăn xiâm hnê ngăn Kuô̆k hô̆i tối, Việt Nam đi đo nhoăm tơdroăng tơrŭm ƀă Uruguay; nhoăm tơdroăng môi tuăn ƀă xúa môi tuăn dêi kuăn pơlê Uruguay ‘măn ăm kơ kuăn pơlê Việt Nam tung rơxông tơplâ pro tơleăng lĕm tơnêi têa hdrối nah, xuân môi tiah tung tơdroăng mơnhông tơnêi têa nôkố.

Péa ngế Kăn xiâm tối sôk ro drêng tơdroăng tơrŭm pơla Việt Nam -Uruguay  pơtối mơnhông tơƀrê, mâu luât pơkâ tơrŭm pơtối tơƀrê, péa pâ pơtối tơrŭm  tơpui tơno krá khât a mâu hneăng hôp lâp plâi tơnêi ƀă tơkŭm cheăng hên tơdroăng ki kal tung lâp plâi tơnêi, Hneăng hôp tơrŭm Đông Á - Mih Latinh, vâ môi tuăn rơtế kring vế mâu luât pơkâ ƀă ki pơxúa dêi Chuh ngiah hên troăng  tung tơdroăng lâp plâi tơnêi pơtối ai mâu tơdroăng ki ôh tá tơniăn, pá vâ ‘nâi hdrối  ƀă ki tơdjâ kơ’nâi dêi pơreăng COVID-19.