VOV4.Xơ Đăng - Klăng leh tơbâ 75 hơnăm Hâi mô đô̆i rong râ – Hlâ hía tung tơplâ xâ nah, tung roh lăm pôu a mâu kong pơlê peăng Tơdế tơnêi têa, kơxo lơ 26/7, pôa Vương Đình Huệ, Kăn xiâm hnê ngăn Kuô̆k hô̆i hiăng troh chôu nhâng, pleăng hơvĭng reăng Ilâng kiâ mô đô̆i hlâ tung tơplâ xâ pơlê kong kơdrâm Quảng Ngãi; chôu nhâng, pleăng hơvĭng reăng a Kơpong tơbâ pôa Phạm Văn Đồng, Ngế pro xiâm hnê ngăn tơnêi têa hneăng hdrối; lăm pôu, diâp kơxuô tơmeăm ăm Nôu Việt Nam khên tơnôu Việt Nam, rơpŏng mơngế ai hnoăng ƀă kăch măng.

A ilâng kiâ mô đô̆i hlâ tung tơplâ xâ pơlê kong kơdrâm Quảng Ngãi, pôa Vương Đình Huệ ƀă khu râ kăn pêi cheăng hiăng kon ko a um meăn mô đô̆i hlâ tung tơplâ xâ, a um dêi mâu mô đô̆i hlâ tung tơplâ xâ, mâu ngế kuăn kơhnâ rơkê dêi pơlê xiâm, tơnêi têa, tơbâ mâu mô đô̆i hlâ tung tơplâ xâ hiăng khên tơnôu pleăng châ chăn mơheăm chá xua tơniăn krê, tơniăn lĕm dêi tơnêi têa.

Hdrối mê, pôa Vương Đình Huệ ƀă khu râ kăn pêi cheăng hiăng troh lăm pôu, diâp kơxuô tơmeăm rơpŏng Nôu Việt Nam khên tơnôu Lê Thị Thư; rơpŏng mô đô̆i rong râ 1/4  Phan Quang Nam, ối a bêng Trần Phú, pơlê kong kơdrâm Quảng Ngãi.

A Sa Ly tơplôu ƀă tơbleăng