Klêi kơ’nâi mơgêi lĕm tro roh lăm pôu pêi cheăng kong têa Kŏng hoa Argentina, hâi lơ 27/5, pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn teăng mâ khu râ kăn xiâm Kuô̆k hô̆i Việt Nam pơxiâm lăm pôu pêi cheăng kong têa Kŏng hoa peăng mâ hâi lo kong têa Uruguay.

Roh lăm pôu pêi cheăng Uruguay roh kố dêi pôa Vương Đình Huệ ƀă Khu râ kăn teăng mâ râ xiâm Kuô̆k hô̆i Việt Nam, vâ thăm pro krá tơniăn, thăm pêi pro rơdêi tâ nếo tơrŭm cheăng nhŏng o, rŭm môi tuăn tiô khôi vâi krâ nah ƀă tŏng kum dêi pó pơla péa tơnêi têa ƀă tơrŭm pơla péa Kơ koan mơjiâng luât, ki rơhêng vâ tối tung hơnăm 2023 drêng péa tơnêi têa Việt Nam – Peăng mâ hâi lo Uruguay leh tơbâ 30 hơnăm mơjiâng tơrŭm cheăng tơpui kâ ƀă kong têa ê.

Tung roh lăm pôu pêi cheăng, pôa Vương Đình Huệ kô tơpui tơno, trâm mâ khu râ kăn pơkuâ khu râ kăn xiâm peăng mâ hâi lo Uruguay; kĭ tơkêa môi tuăn tơrŭm cheăng pơla Kơ koan mơjiâng luât péa tơnêi têa; veăng mâu tơdroăng leh tơbâ 30 hơnăm mơjiâng tơrŭm cheăng tơpui kâ ƀă kong têa ê pơla Việt Nam – peăng mâ hâi lo kong têa Uruguay.