Pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn xiâm teăng mâ Kuô̆k hô̆i Việt Nam hiăng troh lăm pôu pêi cheăng a Tíu xiâm cheăng Fidel Castro Ruz – tíu tơkŭm, rak vế ƀă pơ-ôu pơ-eăng mâu tơmeăm ki kơnâ dêi Kăn xiâm pơkuâ lêng Cuba vâ kum ăm tơdroăng hriăn plĕng ƀă tơbleăng ki kơnâ troăng tơmiât dêi Fidel Castro.

Pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn hiăng troh lăm pôu ngăn tíu mơđah tơbleăng mâu tơmeăm, um xup ƀă tơdroăng rêh ối, tơdroăng cheăng kăch măng, tơbleăng mâu ki kơnâ troăng tơmiât dêi pôa Fidel Castro ƀă tuăn pâ ki má môi dêi pôa Fidel Castro ăm Việt Nam. Tíu xiâm Fidel Castro châ mơjiâng ƀă pêi kêi đeăng tro a roh leh tơbâ 5 hơnăm hía dêi pôa Fidel Castro (25/11/2016 – 25/11/2021).

Kố cho tíu xiâm apoăng ƀă bu ai môi tíu tê dó inâi Kăn xiâm pơkuâ ki rơkê dêi kuăn pơlê Cuba. Kong têa Cuba hiăng tơbleăng luât ki phá tơ-ê ‘na tơdroăng mơjiâng tíu kố xua pói vâ drêng rêh nah dêi Fidel cho klêi kơ’nâi hlâ, ôh tá ai troăng kơphô̆, kơdrum reăng, hngêi trung hriâm, hngêi pơkeăng lơ tíu xiâm, lơ tíu ki lâi dó inâi Pôa Fidel Castro.