VOV4.Xơ Đăng - Pơtối pêi cheăng a mâu kong pơlê Nam Trung Bộ, kơxo lơ 27/7, pôa Vương Đình Huệ, Kăn xiâm hnê ngăn Kuô̆k hô̆i ƀă khu râ kăn pêi cheăng hiăng pêi ƀă Khu pơkuâ cheăng Đảng kong pơlê Quảng Nam.

Pôa Vương Đình Huệ kheăn kơdeăn, ing môi kong pơlê pêi chiâk deăng, Quảng Nam hiăng xông chiâng môi kong pơlê tơxâng hôm tung kơpong, troăng pêi cheăng rế hía rế po rơdâ, cho 1 tung 16 kong pơlê, pơlê kong kơdrâm ai pêi  tơdâng 'na liăn ngân tơnêi têa ƀă cho kong pơlê dêi tơnêi têa ai tá kơpong cheăng kâ po đi đo, kơpong cheăng kâ kĭng têa kơxĭ ƀă kơpong cheăng kâ tíu tê mơdró ngi kong têa ê.

Pôa Vương Đình Huệ, Kăn xiâm hnê ngăn Kuô̆k hô̆i pêi cheăng ƀă Khu pơkuâ cheăng Đảng kong pơlê Quảng Nam

Tơdroăng tŏng kum rêh ối pơlê pơla châ tơniăn, ki má lối cho kơxô̆ mâu ngế ai hnoăng tơnêi têa, mơngế ai hnoăng châ troh lối 23% pơ’leăng mâ kuăn pơlê lâp kong pơlê. Tung la ngiâ, pôa Vương Đình Huệ pơkâ thế, kong pơlê pơtối séa ngăn mâu tơdroăng po rơdâ pêi pro mâu Pơkâ tơdroăng pêi cheăng dêi Tơnêi têa, dêi kong pơlê; mơjiâng troăng pêi nhên vâ pêi pro; mơjiâng troăng pêi tung mơnhông mơdêk ôm hyô, rak tơniăn ôm hyô klêi kơ’nâi pơreăng kân, kong prâi, tê mơdró, tơmeăm ôm hyô thế ai tơdroăng ki mơnhông rơdêi; pêi pro rơdêi 3 tơdroăng pơkâ tơnêi têa.

A Sa Ly tơplôu ƀă tơbleăng