Kơxê hâi lơ  14/5, pôa  Vương Đình Huệ, Kăn xiâm hnê ngăn Kuô̆k hô̆i pêi cheăng ƀă Khu pơkuâ cheăng Đảng kong pơlê Hà Nam ‘na tơdreoăng mơnhông tơbleăng pêi Pơkâ hneăng hôp 13 dêi Đảng, Pơkâ 20 hneăng hôp Đảng bộ kong pơlê. Tơdrêng ƀă tơdroăng pêi pro tiô pơkâ mơnhông cheăng kâ-rêh ối, xo liăn ngân tơnêi têa tung 4 khế apoăng hơnăm kố.

Tơbleăng a rôh pêi cheăng, pôa Vương Đình Huệ, Kăn xiâm hnê ngăn Kuô̆k hô̆i  vâ môi tuăn ƀă troăng rơhlâ, mâu pơkâ, tơdroăng cheăng pêi ƀă troăng rơhlâ ki xiâm ki Đảng bộ kong pơlê Hà Nam hiăng mơnhên tung mâu khế mơ’nui hơnăm 2023 ƀă tơdé hneăng ki u ối, pôa Vương Đình Huệ po troăng mơhno ăm kong pơlê Hà Nam pơtối pêi tro mâu tơdroăng mơjiâng Đảng, mơjiâng khu kăn cheăng kal kí, pơtối pêi pro tơdroăng ki lĕm tro ton nah, kăch măng, tơrŭm, môi tuăn dêi rơpó, rak tro luât, mơdêk hơ’lêh nếo, mơ-eăm tâ nếo vâ pêi châ tơƀrê mâu tơdroăng cheăng ki hiăng pơcháu. ‘Na mơjiâng thôn pơlê nếo tung la ngiâ, Hà Nam kal thế mơdêk tiô troăng rơhlâ pêi chiâk krúa lĕm, mơjiâng thôn pơlê tiô túa nếo ƀă kuăn pơlê rơkê plĕng.