Kơxê lơ 27/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng pơkuâ roh hôp ‘na tơdroăng hbrâ tơkŭm po Hneăng hôp khu râ kăn Kuô̆k hô̆i râ má môi hơnăm ối nếo lâp plâi tơnêi roh má 9.  Xông tơpui a roh hôp, pôa Vương Đình Huệ tối nhên, kố cho tơdroăng tơpui kâ ƀă kong têa ê ki kal dêi Kuô̆k hô̆i hiăng châ Khu xiâm kal kí tơbleăng ăm pêi pro. Kăn xiâm hnê ngăn Kuô̆k hô̆i pơkâ mâu tíu cheăng ki tơdjâk kal tơkŭm pêi tơtro ôh tá xê krê Kuô̆k hô̆i, vâi hdrêng mê ối mơđah tơbleăng um méa tơnêi têa, kuăn mơngế Việt Nam.

Kăn xiâm hnê ngăn Kuô̆k hô̆i pơchân tối, tung pơla hbrâ ăm Hneăng hôp ôh tá hên xếo, kal hbrâ nhên ƀă séa ngăn nhên rêm tơdroăng cheăng vâ tơniăn tơkŭm po châ tơƀrê Hneăng hôp. Pôa Vương Đình Huệ pơkâ thế, Viƀan tơpui kâ ƀă kong têa ê dêi Kuô̆k hô̆i kal hriăn plĕng túa ki rơkê tơtro troăng pêi ki rơkê tung 8 xôh tơkŭm po hneăng hôp hdrối nah, tá mâu tơdroăng pơkâ dêi tơbleăng tơdjuôm; pro mơnhên tơdroăng ki chêh a ko, tơdroăng xiâm dêi 4 roh tơpui tơno, tiô tối hdrối inâi dêi tơdroăng tơbleăng Hà Nội.