VOV4.Xơ Đăng - Kơxo lơ 2/10, pôa Vương Đình Huệ, Kăn xiâm hnê ngăn Kuô̆k hô̆i ƀă khu râ kăn pêi cheăng dêi Tơnêi têa hiăng séa ngăn tơdroăng pêi pro mâu Pơkâ dêi Kuô̆k hô̆i ƀă tơdroăng tơkêa bro mơjiâng troăng kân ăm phêp rơxế kơtâu têi Bến Lức – Long Thành ƀă tơraih tơƀai Long Thành. Kăn xiâm hnê ngăn Kuô̆k hô̆i tối, Tơraih tơƀai lâp plâi tơnêi Long Thành kô chiâng châ ngăn cho môi tơdroăng tơkêa bro ki kân dêi tơnêi têa, tiô tối hdrối, kô pêi  kêi đeăng ƀă djâ ăm xúa a hơnăm 2025, châ pói tơngah chiâng môi tung mâu tíu xiâm pơto tơmối to tơƀai tiô rơxông nếo má môi a kơpong peăng mâ hâi lo pá hdroh châu Á.

Pôa Vương Đình Huệ, Kăn xiâm hnê ngăn Kuô̆k hô̆i diâp tơmeăm ăm rơpŏng kuăn pơlê xĕn tíu ối nếo

Vâ pêi kêi đeăng tro hâi khế pơkâ, Kăn xiâm hnê ngăn Kuô̆k hô̆i pơkâ thế kong pơlê Đồng Nai tơkŭm pêi kơtăng, tơkŭm tâi tơdroăng tăng tơnêi, pơcháu ăm khu mơ’no liăn cheăng, pro ăm mơ-éa mơnhên xúa tơnêi; pơtối tơmâng mơ’no liăn cheăng kêi đeăng mâu tơmeăm hngêi trăng, troăng klông kum ăm kuăn pơlê, tơmâng hnê mơjiâng cheăng pêi  ăm kuăn pơlê ai tơmeăm hlâu tung tơdroăng vâ tăng tơdroăng cheăng kâ, tơniăn kuăn pơlê ai kơlo rêh ối ƀă lơ hên tâ tíu rêh ối ton.

VOV/Tơplôu: A Sa Ly