Kơxê lơ 23/5, pôa Vương Đình Huệ, Kăn xiâm hnê ngăn Kuô̆k hô̆i tơdah pôa Ja Bartosek, Kăn xiâm phŏ hnê ngăn Kuô̆k hô̆i râ má péa Czëch lăm pôu Việt Nam. Pôa Vương Đình Huệ tối nhên, tung pơla hdrối nah, péa tơnêi têa hiăng ai tơdroăng tơrŭm cheăng kal kí tơniăn lĕm, tơdroăng ki mơhno ăm tơdroăng mê cho pơla Chin phuh, Kuô̆k hô̆i péa tơnêi têa đi đo ai tơdroăng tơrŭm cheăng, ƀă pơtroh mâu khu râ kăn lăm pôu a tơnêi têa dêi rơpó.

Kăn xiâm hnê ngăn Kuô̆k hô̆i tơngah, rôh lăm pôu kố dêi kăn xiâm phŏ hnê ngăn Kuô̆k hô̆i râ má péa Czëch kô veăng kum mơdêk tơrŭm cheăng pơla Kuô̆k hô̆i râ má péa tối krê ƀă tơrŭm cheăng pơla péa tơnêi têa tối tơdjuôm. A rôh tơdah, pôa Vương Đình Huệ, Kăn xiâm hnê ngăn Kuô̆k hô̆i ƀă kăn xiâm phŏ hnê ngăn Kuô̆k hô̆i râ má péa Czëch pơrá tối tiah kố, péa tơnêi têa tung tơdroăng tơrŭm cheăng kal kí, tơpui kâ tơniăn lĕm mơni kô thăm pêi pro tơkêa tê mơdró tơniăn krê pơla Việt Nam – EU ƀă pơla EU – Việt Nam, Việt Nam hbrâ rơnáu lôu péa vâ ăm mâu kế tơmeăm dêi Czëch châ mot tung Việt Nam. Peăng Czëch rơhêng vâ tê hơ’nêh chu, ro ngi Việt Nam tung la ngiâ.