Kơxê hâi lơ 26/5, a hngêi Kuô̆k hô̆i, pôa Vương Đình Huệ - Kăn xiâm hnê ngăn Kuô̆k hô̆i hiăng tơdah mâu Kăn Kuô̆k hô̆i Mih xua pôa Mike Crapo pơkuâ djâ dế pêi cheăng a Việt Nam. A rôh tơdah, pôa Vương Đình Huệ - Kăn xiâm hnê ngăn Kuô̆k hô̆i ƀă mâu kăn Kuô̆k hô̆i Mih hiăng tơpui tơdrăng vâ môi tuăn ‘na hên tơdroăng tung rôh tơrŭm cheăng pơla péa pâ ƀă péa Kuô̆k hô̆i tung la ngiâ.

Pôa Vương Đình Huệ, Kăn xiâm hnê ngăn Kuô̆k hô̆i tơdah khu kăn Kuô̆k hô̆i Mih

Pôa Vương Đình Huệ, tối púi vâ Kuô̆k hô̆i péa tơnêi têa pơtối po rơdâ tơrŭm cheăng ing hên tơdroăng pơrá phá vâ mâu kăn Kuô̆k hô̆i Mih ƀă mâu kăn Kuô̆k hô̆i Việt Nam hlê hên tâ ‘na tơdroăng dêi tơrêm kong têa ƀă tơdroăng tơrŭm cheăng pơla péa pâ, malối cho pơla mâu kăn Kuô̆k hô̆i hơnăm ối nếo, mơdêk mơjiâng luât tơpui tơno, tơrŭm pơla Kuô̆k hô̆i péa tơnêi têa, péa Vi ƀan pêi hnoăng cheăng ƀă rĕng mơjiâng Khu kăn Kuô̆k hô̆i môi tuăn tơrŭm cheăng pơla Việt Nam - Mih a Kuô̆k hô̆i Mih, tí tăng ‘nâi plĕng mơjiâng luât pơkâ tơpui tơno, pêi cheăng ki khât pơla mâu Vi ƀan pêi hnoăng cheăng dêi Kuô̆k hô̆i  Việt Nam ƀă Kuô̆k hô̆i  Mih.