VOV4.Xơ Đăng - Kơxê lơ 24/8, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i tơhah pôa Kim Tae-nyeon, Kăn xiâm hnê ngăn Khu tơrŭm cheăng pơla  Hàn Quốc - Việt Nam  drêng lăm pôu pêi cheăng a Việt Nam. A rôh tơdah, pôa Vương Đình Huệ tối, Việt Nam đi đo nhoăm tơdroăng tơrŭm cheăng ƀă Hàn Quốc ƀă tối Hàn Quốc cho kong têa tơrŭm ki kal má môi, ton hơnăm ƀă loi nhoăm khât ôh tá xê to a tung kơpong Peăng kơnhŏng châu Á mê tá tung lâp plâi tơnêi, Chin phuh Việt Nam đi đo pro tơ’lêi hlâu ăm mâu khu ‘no liăn cheăng mơjiâng tơmeăm khoăng, tá mâu khu ‘no liăn cheăng a Việt Nam.

Pôa Vương Đình Huệ, Kăn xiâm hnê ngăn Kuô̆k hô̆i tơdah Khu kăn tơrŭm cheăng pơla Hàn  Quốc - Việt Nam

Peăng tơdroăng tơrŭm cheăng péa kơ koan mơjiâng luât, pôa Vương Đình Huệ, Kăn xiâm hnê ngăn Kim Tae-nyeon khĕn kơdeăn hnoăng cheăng dêi Kăn xiâm hnê ngăn Khu kăn Kuô̆k hô̆i tơrŭm cheăng pơla Hàn Quốc - Việt Nam rơtế ƀă khu kăn Kuô̆k hô̆i cho tíu tơdjêp mơdêk tơrŭm krá pơla péa Kuô̆k hô̆i  ƀă kuăn pơlê péa tơnêi têa; loi khât tiah kố, tung hneăng ki kố, péa Khu kăn Kuô̆k hô̆i tơrŭm cheăng kô mơdêk pêi pro hên tơdroăng trâm mâ klêi tơniăn, ai pơxúa, veăng mơdêk tơrŭm cheăng ƀă tơrŭm pơla kuăn pơlê péa tơnêi têa.

 Gương tơplôu ƀă tơbleăng