VOV4.Xơ Đăng - Kơxê măng lơ 7/9, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng tơdah khu kăn séa ngăn liăn ngân Tơnêi têa Lếo xua pôa Viengthavisone Thephachanh, Kăn hnê ngăn Khu séa ngăn liăn ngân Tơnêi têa Lếo pơkuâ djâ lăm pôu ƀă pêi cheăng a tơnêi têa pin. A rôh tơdah, pôa Vương Đình Huệ mơnhên tối khât kăn pơkuâ kơ koan séa ngăn liăn ngân péa tơnêi têa hiăng ai rôh tơpui tơno tơƀrê, ăm ‘nâi rơtế ƀă tơrŭm cheăng ki tơviah ôh ti ai má péa Việt Nam – Lếo mê kơ koan séa ngăn liăn ngân péa tơnêi têa xuân hiăng ai tơdroăng ki tơrŭm tŏng kum dêi rơpó krá tơniăn tung tơdroăng ki tơdâng tơ’mô ‘na túa tơrŭm cheăng.

Tâ tá rôh tơdah

Kăn hnê ngăn Kuô̆k hô̆i rơhêng vâ péa kơ koan Kuô̆k hô̆i kô pơtối tối ăm dêi rơpó ki rơkê plĕng ‘na tơkŭm po, pêi cheăng dêi khu séa ngăn liăn ngân tơnêi têa, rak vế tơdroăng ki tơniăn krê ‘na tơdroăng cheăng, mơdêk tro má môi hnoăng cheăng dêi kơ koan séa ngăn ‘na liăn ngân, kế tơmeăm tơdjuôm châ loi tơngah ƀă pôu râng hnoăng cheăng a ngiâ Đảng, kuăn pơlê.

Katarina Nga tơplôu ƀă tơbleăng