Peăng xêi hâi lơ 30/6, a hngêi Kuô̆k hô̆i, pôa Vương Đình Huệ hiăng tơdah pôa Gilbert F. Houngbo, Ngế xiâm ngăn ‘na pêi cheăng Lâp plâi tơnêi (ILO). Pôa Vương Đình Huệ tối nhên tiah kố, Việt Nam hâk kơdeăn ƀă mơnê kân khât kơ Khu xiâm ngăn ‘na Pêi cheăng Lâp plâi tơnêi tung tơdroăng Khu kố hiăng tŏng kum Việt Nam hriăn plĕng, kĭ tâk tăm pŏng, thăm mơdêk rak vế, pêi pro tiô luât pơkâ ‘na tơdroăng pêi cheăng, ki malối, cho mâu Luât pơkâ ki nếo achê pơla kố nah. Kăn xiâm hnê ngăn Kuô̆k hô̆i vêh mơnhên tối, mơnhông krá tơniăn tung tâi tâng mâu tơdroăng ki mơnhông ‘na pêi cheăng kâ, rêh ối pơlê pơla, ‘na hyôh kong prâi, têa-tơnêi đi đo cho troăng hơlâ ki rak vế đi đo dêi Việt Nam.

Klêi mê, Việt Nam pơkâ mơjiâng pro tơdroăng tơrŭm cheăng ki tơtro khât, krá tơniăn ƀă rơkê plĕng. Tơnêi têa pôu râng hnoăng cheăng ki kal kân khât, pơkâ pêi pro ‘na rah xo mơngế, xúa mơngế pêi cheăng. Ngế xiâm ngăn ‘na Pêi cheăng Lâp plâi tơnêi tối ăm ‘nâi, teăng mâ mâu khu râ dêi Khu lâp kong têa a Việt Nam ai tối ‘na môi tung mâu tơdroăng pơloăng mơnúa ki dế trâm cho mâu tơdroăng tơkêa bro tơrŭm cheăng ki dế tơrŭm mơnhông nôkố cho mơ’nhê ‘na kuăn mơngế xua tơdroăng ki tro pro hrá ‘na chêh bro hlá mơ-eá mơ’no liăn cheăng.

Klêi mê, tối nhên, mâu râ pêi cheăng dêi Khu lâp kong têa xuân hiăng pêi pro tâi tâng mâu tơdroăng ki tơná kâi pêi pro vâ thăm mơdêk pêi pro mâu tơdroăng tơkêa bro kố.