Kơxê măng lơ 24/10, a Hngêi Kuô̆k hô̆i, pôa Vương Đình Huệ kăn xiâm hnê ngăn Kuô̆k hô̆i hiăng pơkuâ Leh tơdah pôa Samdech Say Chhum, Kăn xiâm hnê ngăn Kuô̆k hô̆i ƀă Khu kăn xiâm Kuô̆k hô̆i  kong têa Kul. Klêi Leh tơdah, péa pâ hiăng tơpui tơno. A rôh hôp tơpui tơno, pôa Vương Đình Huệ, Kăn xiâm hnê ngăn Kuô̆k hô̆i ƀă pôa Samdech Say Chhum, Kăn xiâm hnê ngăn Kuô̆k hôi Kul rơtế tối, hneăng lăm pôu mê cho rôh ki kal tung tơdroăng cheăng ‘mâi mơnhông ƀă mơdêk tơrŭm cheăng kong têa achê tơrŭm ƀă, tơrŭm tung tŭm tơdroăng cheăng dêi Việt Nam - Kul tối tơdjuôm xuân môi tiah pơla mâu kơ koan mơjiâng luât péa tơnêi têa tối krê.

Rơtâ tâ tá hneăng hôp tơpui tơno

Pôa Vương Đình Huệ púi vâ, péa tơnêi têa kal mơdêk rĕng pê klêi  “Pơkâ tâi tâng tơdroăng tơdjêp péa tơdroăng cheăng kâ Việt Nam - Kul troh hơnăm 2030’’; pơtối pro tơ’lêi hlâu ăm khu ‘no liăn cheăng dêi khu mơdró a tơrêm kong têa tơdjêp tơrŭm cheăng. Tơrŭm rak ngăn tơ ƀrê ‘na kring tơniăn troăng tơkăng kong, séa ngăn kơtăng khât vâ mơdât mâu khu ngế ki ai xôi ƀă mâu tơdroăng mot lo ôh tá tro luât, tơdroăng mot lo dêi khu ‘mêi “Tê mơngế”.

‘Na Kuô̆k hô̆i Việt Nam ƀă Tơrŭm cheăng Kuô̆k hô̆i pơla péa tơnêi têa, péa ngế Kăn rơtế púi vâ, péa pâ pơtối rak vế tơpui tơno ăm dêi rơpó ‘nâi tơdroăng kal tung tí tăng ‘nâi plĕng, tăng ‘nâi mâu tơdroăng klêi mê tơkŭm vâ pêi mâu tơdroăng cheăng dêi Kuô̆k hô̆i râ  má môi; pơtối rak vế luât pơkâ tơrŭm cheăng a mâu hneăng hôp hên troăng ƀă hía hé.