Kơxê lơ 24/4, tiô chôu kong têa, a tíu pêi cheăng kăn xiâm pơkuâ kong têa Argentina, pôa Vương Đình Huệ, Kăn xiâm hnê ngăn Kuô̆k hô̆i hiăng tơpui tơno ƀă pôa Alberto Angel Fernandez, Kăn xiâm pơkuâ kong têa Argentina. A rôh tơpui tơno, péa ngế kăn xiâm pơkuâ mơnhên tối khât tơrŭm cheăng tung tâi tâng Việt Nam – Argentina tung pơla hdrối nah pơtối mơnhông tơƀrê, pơxúa, ing tơdroăng ki pơtroh mâu kăn ƀă trâm mâ tơrá khu kăn xiâm; mâu troăng hơlâ tơrŭm cheăng môi tiah Vi ƀan tơrŭm Chin phuh ƀă Tí tăng ‘nâi plĕng ‘na tơdroăng kal kí pơla péa Khu xiâm tơpui kâ châ tơbleăng rêm khế, rơkê tung mâu tơdroăng tá tung pơla ai pơreăng kân COVID-19.

Péa ngế kăn xiâm pơkuâ kong hiăng môi tuăn pêi pro trâu rơdâ tơrŭm cheăng kal kí – tơpui kâ trâm mâ kuăn pơlê, tơdrêng amê hlối xúa ki pơxúa ai mâu kế tơmeăm ki chiâng tâ tŏng kum dêi rơpó vâ mơ-eăm rơtế ăm kơxô̆ liăn pêi lo châ a kơlo 10 rơtal dollars a hơnăm 2025.

Pôa Vương Đình Huệ, Kăn xiâm hnê ngăn Kuô̆k hô̆i tối nhên tơdroăng ki thăm mơdêk tơrŭm cheăng pơla Kuô̆k hô̆i péa tơnêi têa veăng kum kal khât tung tơdroăng mơdêk tơrŭm cheăng pơla péa pâ tối tơdjuôm xuân môi tiah mơjiâng ƀă tơbleăng tơdroăng luât pơxúa tơ’lêi ăm pơla péa tơnêi têa tối krê.