A pơlê kong xiâm La Habana, Cuba, pôa Vương Đình Huệ, Kăn xiâm hnê ngăn Kuô̆k hô̆i hiăng ai rôh tơpui ƀă Ngế pro xiâm hnê ngăn kong têa Cuba pôa  Manuel Marrero Cruz. A rôh trâm, pôa Vương Đình Huệ, kăn xiâm hnê ngăn Kuô̆k hô̆i pơtroh ƀă pôa Manuel Marrero Cruz rơkong koh hmât ƀă mâu tơdroăng ki hâk mơnâ má môi dêi Kuô̆k hô̆i ƀă kuăn pơlê Việt Nam.

Klêi mê, tối nhên Đảng, Tơnêi têa, Chin phuh, Kuô̆k hŏi ƀă kuăn pơlê Việt Nam đi đo rơtế môi tuăn ƀă tơdroăng cheăng kăch măng tơdrăng dêi kuăn pơlê Cuba nhŏng o. Kăn xiâm hnê ngăn Kuô̆k hô̆i tối ƀă Ngế pro xiâm hnê ngăn kong têa Cuba tung pơla hơ’lêh nếo ƀă mâu tơdroăng cheăng dêi Kuô̆k hô̆i ki a chê kố, veăng kum tung mơnhông mơdêk cheăng kâ rêh ối pơlê pơla, mot tơrŭm ƀă lâp plâi tơnêi dêi Việt Nam.

Tối tơbleăng ‘na mâu tơdroăng mơnhông tung tơrŭm cheăng pơla Kuô̆k hô̆i péa tơnêi têa. Tung la ngiâ ah, pôa Vương Đình Huệ, Kăn xiâm hnê ngăn Kuô̆k hô̆i tối nhên Kuô̆k hô̆i Việt Nam kô pơtối tơrŭm krá tơniăn ƀă Kuô̆k hô̆i Cuba vâ pro tơ’lêi hlâu ăm mâu khu mơdró kâ péa tơnêi têa mơdêk tơrŭm cheăng kâ, tê mơdró, ‘no liăn cheăng mơnhông tơxâng ƀă tơrŭm cheăng kal kí tơniăn lĕm pơla péa tơnêi têa, tro tiô hiâm mơno hnê mơhno ƀă rơhêng vâ dêi mâu kăn pơkuâ xiâm péa tơnêi têa.