VOV4.Xơ Đăng - Kơxê lơ 29/9, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơpui tơno ƀă pôa Manuel Marrero Cruz, Ngế pro xiâm hnê ngăn kong têa Cuba dế ai rôh lăm pôu păng ‘nâng a Việt Nam sap ing hâi lơ 28/9 troh lơ 2/10. A rôh tơpui tơno, pôa Vương Đình Huệ, kăn xiâm hnê ngăn Kuô̆k hô̆i tối nhên, Kuô̆k hô̆i ƀă kuăn pơlê Việt Nam đi đo ối a chê,  tŏng kum hnoăng cheăng kăch măng tơtro ăm kuăn pơlê Cuba nhŏng o; ngăn nhuô̆m, rak vế mơdêk tâ nếo tơrŭm tơroâ ƀă tơrŭm tơviah pơla Việt Nam – Cuba.

Pôa Vương Đình Huệ, kăn xiâm hnê ngăn Kuô̆k hô̆i tơpui tơno ƀă Ngế pro xiâm hnê ngăn kong têa Kŏng hòa Cuba

Kăn xiâm hnê ngăn Kuô̆k hô̆i tối nhên, Kuô̆k hô̆i Việt Nam kô pơtối tơrŭm krá tơniăn ƀă Kuô̆k hô̆i Cuba vâ tối tơbleăng ăm dêi rơpó tơdroăng ki rơkê plĕng ‘na hnoăng cheăng kong têa ê ƀă tung kơpong. Ngế pro xiâm hnê ngăn Cuba tối nhên Cuba mơnhên tối khât tơrŭm tơroâ khôi hmâ ki tơviah pơla péa tơnêi têa hiăng châ pôa Hồ Chí Minh prếi pôa Fidel Castro pơkâ, châ hên kăn pơkuâ mâu rơxông ƀă kuăn pơlê péa tơnêi tơbêng pêi pro.

VOV/Tơplôu: Katarina Nga