Pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn teăng mâ Kuô̆k hô̆i Pơlê kong kân Hải Phòng nếo trâm mâ kuăn pơlê a pơlê kân Ngô Quyền, pơlê kong kân Hải Phòng. A roh trâm mâ, teăng mâ Khu râ kăn Kuô̆k hô̆i Pơlê kong kân Hải Phòng hiăng tối tơbleăng a ngiâ kuăn pơlê tơdroăng xiâm dêi hneăng hôp má 5, Kuô̆k hô̆i hneăng má 15 la ngiâ; tơdroăng mơnhông mơdêk cheăng kâ - rêh ối pơlê pơla; tơbleăng tơdroăng châ tơƀrê hneăng hôp má 4.

Kuăn pơlê Hải Phòng hiăng pơkâ hên tơdroăng tơdjâk troh mâu troăng hơlâ ki kal dêi tơnêi têa ƀă tơdroăng rêh ối kuăn pơlê môi tiah hbrâ mơdât kâ kơhveăm liăn ngân, mơ’nhê tê kơtê; thăm pêi pro rơdêi mơ’no liăn cheăng tơnêi têa ƀă mâu kơxô̆ liăn tŏng kum, rak tơniăn cheăng kâ; tŏng kum drêng pá puât ăm mâu khu tê mơdró; mơnhông mơdêk ôm hyô,...

Tiâ rơkong kơ-êng dêi kuăn pơlê tơdjâk troh tơdroăng tah lôi pá puât ăm mâu khu tê mơdró ‘na troăng pơkâ pêi, troăng hơlâ tŏng kum khu tê mơdró tơniăn tơdroăng nôkố, pôa Vương Đình Huệ, Kăn xiâm hnê ngăn Kuô̆k hô̆i tối nhên: Chin phuh tơbleăng Kuô̆k hô̆i pơtối tơdroăng tơkêa bro ‘na kơdroh ki kơnâ tơtêk 2% môi tiah hơnăm nah.

Tơdroăng kơdroh, pro ton, ôh tá xo hnoăng mơhá, kơxô̆ liăn mơ'no cheăng nôkố dế pêi pro. Xua mê, tá mâu tơdroăng a ngiâ ƀă ton xŏn, ôh tá trut ki pá puât ăm kuăn pơlê, khu tê mơdró.