Pôa Vương Đình Huệ tối ăm ‘nâi, Kuô̆k hô̆i Việt Nam ƀă krê Kăn xiâm hnê ngăn Kuô̆k hô̆i kheăn kơdeăn tơrŭm cheăng nhŏng o ƀă tơrŭm pơla péa tơnêi têa, tá ‘na ƀâng Chin phuh ƀă Kuô̆k hô̆i râ má môi.

Péa pâ hiăng kĭ hên mơ-éa môi tuăn tơrŭm cheăng, ki rơhêng vâ tối cho tơdroăng mơjiâng Khu tơrŭm cheăng ton xŏn ‘na liăn ngân tơniăn lĕm; mơnê kong têa Luxembourg hiăng ƀă dế pơtối ăm Việt Nam tơdroăng môi tuăn – ki má lối cho tung kơvâ kơdroh kơtiê ƀă hbrâ ví kong prâi hơ’lêh, kong têa Luxembourg cho môi tung mâu kong têa rĕng kĭ Pơkâ tŏng kum mơ’no liăn cheăng Việt Nam – EU (EVIPA).

Ngế pro xiâm hnê ngăn kong têa Luxembourg tối ăm ‘nâi, hâi lơ 5/5, péa pâ tơkŭm po hneăng hôp tơpui tơno cheăng kâ veăng amê ai 25 khu tê mơdró kong têa Luxembourg. Tối ‘na tơdroăng ki hâk ‘na troăng hơlâ cheăng kâ dêi Việt Nam tung pơla lâp plâi tơnêi dế ai ôh tá tơniăn, Ngế pro xiâm hnê ngăn kong têa Luxembourg tối, Việt Nam ôh tá xê to tơtrŏng mơnhông mơdêk cheăng kâ, mê ối tơtrŏng kơdroh mơ’no trếo ki ‘mêi hngêi nhĕng.

Klăng roh kố, Ngế pro xiâm hnê ngăn kong têa Luxembourg pói vâ, Việt Nam rĕng tah visa ƀă kuăn pơlê kong têa Luxembourg vâ pro tơ’lêi hlâu ăm tơdroăng thăm mơnhông mơdêk tơrŭm cheăng, tê mơdró ƀă trâm mâ tơpui tơno pơla kuăn pơlê. A roh trâm mâ tơpui tơno, péa Kăn xiâm tơnêi têa xuân môi tuăn ‘na tơdroăng kal mơdêk tâ mê nếo tung kơvâ liăn ngân tơniăn lĕm; pói vâ rơtế tŏng kum dêi pó môi tơdroăng cheăng kâ kruá lĕm, liăn ngân tơniăn lĕm.