Tung roh lăm pôu pêi cheăng kong têa Argentina, kơxo kố 26/4, tiô chôu Việt Nam, pôa Vương Đình Huệ, Kăn xiâm hnê ngăn Kuô̆k hô̆i hiăng ai ƀai xông tơpui troăng hơlâ ki kal a Tơdroăng kal leh tơbâ 50 hơnăm tơrŭm cheăng Argentina – Việt Nam nôkố ƀă tung la ngiâ.

Tiô pôa Vương Đình Huệ, mơhé kơtăn hơngế dêi pó tơdế plâi tơnêi ƀă mơhé ối a péa kơpong, péa hdroâng mơngế xuân rơtế tối ăm dêi pó ƀă mơnhông mơdêk ki kơnâ tơdjuôm mơnhông mơdêk ƀă rơkê: Mê cho tơdroăng pói vâ tơniăn krê, kuăn pơlê pơkuâ dêi hnoăng cheăng ƀă mơnhông mơdêk ăm tơnêi têa, tơniăn krê, hơniâp lĕm ƀă rơkê ăm kuăn pơlê.

Pơtối mê, péa tơnêi têa kal pơtối thăm mơjiâng tơrŭm cheăng pơla Khu râ kăn pơkuâ péa tơnêi têa, ing mâu roh lăm pôu pêi cheăng râ kăn xiâm ƀă trâm mâ a mâu hneăng hôp tơpui tơno kơpong ƀă lâp plâi tơnêi; mơnhông mơdêk ki rơdêi hnoăng dêi ƀâng Kuô̆k hô̆i râ má môi péa tơnêi têa, mâu Đảng xiâm; mơnhông mơdêk hnoăng dêi mâu troăng tơkŭm po tơpui tơno. Péa pâ kal xúa mâu tơdroăng pêi cheăng ƀă tơkêa tơ’lêi hlâu tê mơdró, ki rơhêng vâ tối cho MERCOSUR, CPTPP, tơdrêng amê tơmiât troh FTA pơla Việt Nam ƀă MERCOSUR.