Kơxê lơ 20/6, pôa Vương Đình Huệ, Kăn xiâm hnê ngăn Kuô̆k hô̆i tơdah pôa Lebedev Vyacheslav Mikhailovich, Kăn xiâm pơkuâ hngêi tơleăng xiâm kong têa Rusi dế lăm pôu, pêi cheăng a Việt Nam. Kăn xiâm hnê ngăn Kuô̆k hô̆i mơnhên, Việt Nam đi đo thăm pêi pro, po rơdâ tơrŭm cheăng ƀă kong têa Rusi cho môi tung mâu tơdroăng kơjo má môi tung troăng hơlâ tơpui kâ ƀă kong têa ê. Việt Nam đi đo pâ vế tơdroăng tŏng kum kân kĭn, tuăn pâ tá hiâm mơno dêi Liên Xô, nôkố cho kong têa Rusi tung tơdroăng tơplâ tơleăng lĕm tơnêi têa hdrối nah xuân môi tiah tung tơdroăng mơjiâng tơnêi têa nôkố.

Kuô̆k hô̆i Việt Nam môi tuăn Hngêi tơleăng xiâm Việt Nam ƀă Hngêi tơleăng xiâm kong têa Rusi xuân môi tiah mâu kơ koan hnê arak luât péa tơnêi têa rế hía rế rŭm môi tuăn, tơrŭm dêi pó krá tơniăn tâ. Kăn xiâm pơkuâ hngêi tơleăng xiâm kong têa Rusi loi tơngah, roh lăm pôu pêi cheăng roh kố kô kum po rơdâ tơrŭm cheăng ƀă khu râ kăn xiâm pơkuâ hngêi tơleăng xiâm Việt Nam; tơdroăng tơpui tơno mâu khu râ kăn kô pơtối châ péa kong têa thăm pêi pro tung la ngiâ; tơdrêng amê tơdroăng trâm mâ tơpui tơno kuăn pơlê xuân pơtối mơnhông mơdêk.