Cho môi tung 84 ngế kăn ki châ rah xo, châ pôk mot cheăng tung Khu kăn hnê ngăn Hô̆i đong kong pơlê Dak Lak hneăng hơnăm 2026-2031, jâ H’Giang Niê, Kăn pơkuâ hnê ngăn Đảng ủỉ, Kăn hnê ngăn Hô̆i đong kuăn pơlê cheăm Ea MDroh pơtối châ kuăn pơlê rah xo klêi kơ’nâi pêi cheăng hiăng châ 1 hneăng tung Hô̆i đông hnê ngăn kong pơlê. Tiô jâ H’Giang tối ăm ngin ‘nâi, tơdroăng ki pơtối châ pôk rah xo ôh tá xê to vâ mơnhên dêi hnoăng cheăng tơná mê ối pơkal athế pêi pro hên tơdroăng cheăng ki a’ngêi luâ tâ, pêi pro hên tơdroăng ki nhên, ki tro, ki hngăm tâ. Rêm kơtâ hlá phĭu dêi vâi krâ-nhŏng o pôk rah xo jâ ki xiâm cho tuăn loi ‘na môi ngế ki ai ivá ki rơkê vâ pơhlêh tơdroăng cheăng rơkê tâ, ki mơnhông ó rơdêi  luâ tâ dêi kơpong tơnêi tíu ki kố. Jâ H’Giang tối ăm ngin ‘nâi:

“Tung túa cheăng dêi Khu kăn hnê ngăn péa râ tiô á mơnhên tối, hnoăng cheăng tơná á cho “kông ki tơdjêp” achê, ‘nâi hlê, hmâ ƀă kuăn pơlê má môi. Á kô rak vế tơdroăng tơrŭm cheăng ki achê, hmâ, achê, hlê plĕng, mơnhên tối tơdroăng ki ai păng ‘nâng ƀă tơdrêng mâu rơkong púi pâ vâ dêi kuăn pơlê pơtroh ăm rêm roh hop Hô̆i đong hnê ngăn kong pơlê, ing mê, rak mâu Troăng hơlâ ki mơ’no mê athế păng ‘nâng “tro” ƀă “Cho khât” ƀă tơdroăng rêh ối-cheăng kâ dêi cheăm. Tung mê, á tŏng gum ngăn khât ƀă troăng pơkâ tơveăng gum ăm hdrông kuăn ngo, thăm mơdêk tơrŭm tung kơvâ ôm hyô ngăn ‘na pêi chiâk pêi deăng hnối tơrŭm ƀă tơdroăng kring vế, rak ngăn, pơtối mơdêk túa lĕm tro, veăng gum ăm vâi krâ-nhŏng o thăm mơdêk hnoăng cheăng rêh kâ ối ƀă kơdo mơ-eăm tơkâ luâ mâu tơdroăng kơtiê xahpá, ai tơdroăng rêh kâ ối tơniăn lĕm”.

Ƀă jâ Ngô Thị Minh Trinh, Kăn pơkuâ hnê ngăn Đảng ủi, Kăn hnê ngăn Hô̆i đong cheăm Ea Knuêč, kong pơlê Dak Lak ai hlo nhên, tung hneăng ki mơnhông nếo nôkố, mâu kăn teăng mâ ôh tá xê to tơmâng, mơhno mơnhên ki păng ‘nâng ƀă tuăn mơno dêi kuăn pơlê, kring vế, rak ngăn hnoăng ki tơtro khât dêi kuăn pơlê mê ối cho i hiâm mơno kâi chân, tuăn ngôa rơkê, kơhnâ khât tung trâm mâ, tơpui tơno, hnê tối kuăn pơlê, veăng pêi pro trâu rơdâ hên tâ tung tơdroăng ki mơjiâng ƀă séa mơnhên mâu troăng tơdjâ, troăng pơkâ, troăng tơveăng tŏng gum kuăn pơlê hdrông kuăn ngo, ki rơhêng vâ tối, mâu kơvâ cheăng ki cheăm ai ivá tơ’lêi hlâu vâ mơnhông mơdêk, ing mê, pơtối mơnhông tơtêk ó rơdêi tâ nếo. Jâ Ngô Thị Minh Trinh tối ăm ngin ‘nâi:

“Kố cho tơdroăng ki hơniâp ro ƀă tơná á ƀă á xuiân đi đo tơmiât tiah kố, cho tơdroăng ki hâk mơnê ƀă pôu râng dêi hnoăng cheăng ki kân hngăm. Xua ti mê, á athế pêi pro, mơhno mâu tơdroăng cheăng ki lĕm tro má môi dêi kăn teăng mâ ăm kuăn pơlê. Ƀă kong pơlê Dak Lak, tơdroăng ki rơdêi má môi cho tơdroăng pêi chiâk pêi deăng, ƀă hnoăng cheăng cho mơngế kăn teăng mâ, á kô tơkŭm vâ rơtế ƀă khu râ kăn hnê ngăn rêm râ vâ mơjiâng chiâng ki kơnía git ƀă mâu kế tơmeăm pêi lo ki châ kơnâ yă, ing mê, vâ vêh pơtroh ăm tơdroăng tơniăn, mơnhông mơdêk tung rêh ôí, cheăng kâ ăm kuăn pơlê, tơdroăng ki mơnhông tơdjuôm dêi kong pơlê ƀă ki rơhêng vâ tối khŏm pêi lo liăn ngân tâk châ 2 to kơxô̆”.

Ki păng’nâng ăm hlo, Dak Lak cho kong pơlê ki tơ’lêi hlâu hên ‘na kơvâ  chiâk deăng ƀă ối ‘ro ‘na cheăng kơmăi kơmok-tê mơdró kâ, khoa hok kŏng ngê̆. Hneăng hơnăm 2026-2031, Mâu kăn Hô̆i đong hnê ngăn Kuăn pơlê ƀă kơ koan dêi kong pơlê a kong pơlê, kô kal rak vế, pêi pro tro tiô hiâm mơno pói rơhêng vâ dêi  kuăn pơlê tung hên kơvâ cheăng, malối cho kơvâ hnê hriâm, pơhlêh tơdroăng ki rơkê plĕng tiô túa nếo - pơxiâm tăng mơjiâng tơdroăng cheăng pêi, xing xoăng tơnêi tíu ối, tơnêi tíu pêi kâ, hngêi pêi cheăng kơmăi kơmok mơjiâng pro kế tơmeăm, mơjiâng inâi tíu mơdró ƀă tơrŭm tê mơdró kế tơmeăm, mâu hngêi kơchơ.

Klêi kơ’nâi tâ phĭu rah pôk khu kăn, tơdroăng ki kal vâ ‘nâi nhên ahdrối tâ dêi kuăn pơlê, mê mâu kăn ki châ dêi tơná rah xo mê ah, kô pêi pro klêi mâu tơdroăng cheăng troh a kơlo ki lâi, vâi pêi pro trối lâi tiô mâu tơdroăng ki tơná vâi hiăng tơhrâ dêi. Tiô pôa Trần Xuân Định, Kăn pơkuâ ngăn cheăng Măt trâ̆n, Tôh kơphô̆ 2, bêng Thành Công, kong pơlê Dak Lak tối ăm ngin ‘nâi, kuăn pơlê tí tăng séa ngăn ƀă pơkal athế mâu kăn ki châ pôk mê kô pêi pro dêi tơdroăng ki vâi hiăng tơhrâ, tơkêa dêi tung hneăng ki vâi pro kăn mê ah:

“Mâu vâi ngoh vâi nâ ki hiăng châ rah xo pro kăn teăng mâ kuăn pơlê, hiăng chiâng mâu ngế ki trối “kông tơdjêp” pơla tuăn tơmiât dêi Đảng ƀă hiâm mơno dêi kuăn pơlê. Á pói tơngah má môi, pó vâi ngoh vâi nâ athế achê ƀă kuăn pơlê, hmâ ƀă kuăn pơlê, hlê plĕng trâu rơdâ, nhên tơdroăng rêh ối, pêi cheăng dêi kuăn pơlê vâ ing mê mơjiâng, mơnhông kong pơlê xông tơtêk rế hía rế a’ngêi tâ a la ngiâ”.

Tiô jâ Cao Thị Hoà An, Vi ƀan xiâm Đảng, Phŏ Kăn hnê ngăn má môi dêi Tỉnh ủi, Kăn hnê ngăn Hô̆i đong hnê ngăn kong pơlê, Kăn hnê ngăn Vi ƀan ngăn ‘na pôk tâ phĭu rah xo kăn kong pơlê Dak Lak tối ăm ngin ‘nâi, hneăng tâ phĭu rah xo kăn Kuô̆k hô̆i hneăng má XVI ƀă mâu kăn Hô̆i đong hnê ngăn rêm râ hneăng hơnăm 2026-2031 a kong pơlê hiăng hbrâ rơnáu tŭm ƀă tơkŭm pêi pro krâu rơhí rơhó, rak tro tiô hiâm mơno kuăn pơlê pói rơhêng vâ, tro tiô luât, tơniăn ƀă ƀlêi chiâng tơniăn tro.

Ai 84 ngế kăn teăng mâ Hô̆i đong hnê ngăn kong pơlê hneăng XI hiăng châ kuăn pơlê loi tơngah rah pôk xo cho mâu ngế ki rơkê păng ‘nâng, ai hiâm mơno tơdrăng lĕm ƀă rơkê plĕng, teăng mâ ăm tuăn mơno, pói rơhêng vâ dêi mâu kuăn pơlê, rêm hdrông kuăn ngo tung kong pơlê. Kố cho tơdroăng ki hâk mơnê, xuân cho pôu râng hnoăng cheăng ki kân, pơkal thế rêm ngế kăn pơtối kơdo mơ-eăm, pơtối mơdêk hnoăng cheăng tung hneăng ki nếo:

“Mâu kăn teăng mâ, mâu ngế ki rơkê plĕng, ai tuăn mơno tơdrăng lĕm, hlê rơkê hên tơdroăng ki nếo, pơtối mơdêk i hiâm mơno pôu râng tơdroăng cheăng, rak vế ki tơrŭm cheăng krá tơniăn ƀă tối mơnhên mâu tơdroăng ko tơdrăng khât tro tiô hiâm mơno pói rơhêng vâ dêi kuăn pơlê. Tơdrêng amê, mâu kăn teăng mâ athế kơhnâ veăng pêi pro mâu tơdroăng ki pơkâ thế dêi mâu tơdroăng ki kal dêi kong pơlê, cheăm ƀă seá mơnhên ngăn krá tơniăn ‘na mâu tơdroăng ki rak vế, pêi pro mâu troăng tơdjâ, troăng tơveăng gum hnê tối ‘na luât tung kong pơlê, tung tơrêm cheăm, ing mê, vâ mơnhông ki dâi lĕm khât mâu hnoăng cheăng dêi kơ koan ki kuăn pơlê hiăng pôk rah tung la ngiâ ah”.

Pin hiăng ‘nâi nhên, ki ƀlêi chiâng dêi hneăng tâ phĭu, rah pôk xo khu kăn ôh tá xê to tơdroăng pêi pro kêi đeăng tơdroăng pơkâ mơ’no mê ối po ăm môi hvêa chêng prôk ki hơngế, a’ngêi tâ tro tio hiâm mơno pói rơhêng vâ. Mâu ngế ki châ pôk pro kăn mê, pơxiâm sap ing hâi kố kô pôu râng mâu hiâm mơno púi rơhêng vâ dêi kuăn pơlê, pơxiâm pêi pro dêi mâu hnoăng tơná, pôu râng tơdroăng cheăng ƀă tuăn i hiâm krâu khât, kơhnâ khât, pêi pro mâu tơdroăng ki nhên khât, veăng gum mơnhông Dak Lak châ mơnhông rĕng ƀă krá tơniăn.