Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i, Kăn hnê ngăn Hô̆i đong Tâ phĭu tơnêi têa tối rơdêi rôh tâ phĭu hiăng tơkŭm po ƀlêi chiâng tơniăn lĕm, cho tơdroăng ki cheăng ‘na kal kí trâu rơdâ, hâi leh kân dêi tâi tâng kuăn pơlê, châ kuăn pơlê tung tơnêi têa ƀă a kong têa ê mơnhên tối khât.

Klêi kơ’nâi tâ phĭu, kuăn pơlê tung lâp tơnêi têa hiăng pôk 500 ngế Kuô̆k hô̆i, 2.552 ngế kăn Hô̆i đong hnê ngăn râ kong pơlê ƀă 72.438 ngế kăn Hô̆i đong hnê ngăn râ cheăm. Mâu ngế ki kố ăm hlo cheăng hbrâ rơnáu mâu ngế pêi cheăng châ pêi pro krá tơniăn, tro luât pơkâ.

Kố xuân cho troăng hdró ki kal tung tơdroăng vâ pêi pro lĕm Tơnêi têa hnoăng pơkuâ xah hô̆i chuh ngiah dêi Kuăn pơlê, xua Kuăn pơlê ƀă dêi Kuăn pơlê, tơdrêng amê hlối thăm mơnhông pơhlêh nếo khu tơrŭm kơ koan cheăng tơnêi têa, xúa kăn pơkuâ kong pơlê péa râ ƀă mơdêk rơdêi pơhlêh kơxô̆, ứng dụng kong ngê̆ tung pơkuâ ngăn.