Hâi lơ 29/5, Ngế pro xiâm hnê ngăn Chin phuh pơkâ kơxô̆ 17 ‘na mơdêk hnê mơhno, tơrŭm tơkŭm po tơ’noăng râ má pái phôh thong ƀă rah xo mot hriâm đăi hok, hnê cheăng pêi hơnăm 2023. Vâ tơkŭm po Hneăng tơ’noăng ƀă rah xo mot hriâm đăi hok, hnê hriâm cheăng hơnăm 2023, Ngế pro xiâm hnê ngăn Chin phuh pơkâ thế Khu xiâm ngăn hnê hriâm ƀă hnê mơjiâng tuăn ngoâ rơkê, mâu khu xiâm, kơvâ cheăng, kơ koan tơdâng, kơ koan ối tung Chin phuh, Vi ƀan hnê ngăn mâu kong pơlê, pơlê kong kân ối tung Tơnêi têa pêi pro tŭm hnoăng cheăng châ pơcháu, tung mê, ƀă Khu xiâm ngăn hnê hriâm ƀă hnê mơjiâng tuăn ngoâ rơkê: Pơkâ tŭm, teăm tơdrêng mâu hlá mơ-éa hnê mơhno, túa pơkâ tơkŭm po Hneăng tơ’noăng ƀă rah xo mot hriâm đăi hok, kao đăng kơvâ Hnê hriâm Mầm non; rak vế ko ƀai tơ’noăng tơniăn, tro, pêi pro châ tơdroăng ki rơhêng vâ dêi Hneăng tơ’noăng ƀă rah xo mot hriâm.

Ƀă Vi ƀan hnê ngăn mâu kong pơlê, pơlê kong kân ối tung Tơnêi têa: Hnê mơhno tơkŭm pêi pro ƀă pôu râng dêi tâi tâng hnoăng cheăng ‘na Hneăng tơ’noăng a kong pơlê. Bro tơ’lêi hlâu ‘na prôk lăm, kâ, ối ăm hok tro ƀă nôu pâ nhŏng ki chiân vâi lăm tơ’noăng a mâu tíu tơ’noăng, malối cho mâu ngế ki xơpa, kơpong hngế hngo, kơpong kuăn pơlê hdroâng kuăn ngo, peăng kong ngo ƀă tíu tơkăng kong, chuăn rơlố.