VOV4.Xơ Đăng - Kơxo lơ 14/8, Tíu chô ‘măn rak vế tơmeăm khoăng ton nah Dak Lak tơrŭm ƀă Khu pơkuâ chô ‘măn, rak vế reăng rĭng kong Việt Nam, Viê̆n Kŏng nghê̆ sinh hok ƀă Kong prâi – Hngêi trung Đăi hok Tây Nguyên, ƀă mâu tíu tơkŭm po Tơdroăng ‘’Djâ reăng rĭng ƀă ki chiâng ai xêh’’, pêi pro pơklêp lối 3.000 túa reăng rĭngpơklêp a mâu loăng ngiêt tung kơdrum Tíu chô ‘măn rak vế tơmeăm khoăng ton nah Dak Lak ƀă Tíu chô ‘măn rak vế tơmeăm khoăng ton nah tơnêi têa kơxô̆ 4 Nguyễn Du (hmâ khĕn cho Biệt Điện Bảo Đại).

Pơklêp lối 3.000 xiâm reăng rĭng pơklêp a mâu loăng ngiêt

Pôa Phan Xuân Thủy, Kăn hnê ngăn Khu ki hâk vâ reăng rĭng Việt Nam, tối ăm ‘nâi, sap ing kố troh mơ’nui hơnăm, tơdroăng ‘’Djâ reăng rĭng ƀă ki chiâng ai xêh’’ kô ối châ tơkŭm po dâng 3 roh, pêi pro pơklêp reăng rĕng a tâi tâng mâu loăng ngiêt tung Tíu chô ‘măn rak vế kế tơmeăm khoăng ton nah Dak Lak (pơlê kong kơdrâm Ƀuôn Ma Thuột) ƀă djâ reăng rĭng vêh tung kong Tơnêi têa Yok Đôn, ƀă pói vâ rak vế, rak ‘măn mâu hdrê reăng rĭng ki kơnâ tung kong kê xuân môi tiah tơmối châ ngăn ki lĕm dêi kơpong tơnêi Dak Lak.

A Sa Ly tơplôu ƀă tơbleăng