VOV4.Xơ Đăng - Tiô tối hdrối, Rôh hôp má 16 dêi Khu kăn pơkuâ Kuô̆k hô̆i kô po a hâi lơ 10/10. A rôh hôp kố, Vi ƀan pơkuâ Kuô̆k hô̆i kô tơpui tơno ăm rơkong tơpui tối ‘na kơxop hlá mơ-éa tối tơbleăng tâi tâng mâu rơkong tơpui tối dêi kuăn pơlê pơtroh ăm hneăng hôp má 4 dêi Kuô̆k hô̆i; ăm rơkong tơpui tối ‘na hlá mơ-éa tối tơbleăng: Klêi kơ’nâi séa ngăn tơdroăng ki pơkâ tơleăng, tiâ mơnhên rơkong pâ thế dêi kuăn pơlê troh a hneăng hôp má 3 dêi Kuô̆k hô̆i.

Rôh hôp ‘na luât khế 9/2022 dêi Vi ƀan pơkuâ Kuô̆k hô̆i

Klêi kơ’nâi tơdah kuăn pơlê, tơdah xo pơkâ tơleăng mâu kơthô dêi kuăn pơlê ƀă klêi kơ’nâi séa ngăn tơdroăng ki pơsăm tối, pơsăm tơkêng dêi kuăn pơlê pơtroh ăm Kuô̆k hô̆i hơnăm 2022. Ăm rơkong veăng tơpui tối ‘na hlá mơ-éa tối tơbleăng dêi Chin phuh ‘na: Tơdroăng pêi pro túa pơkâ mơnhông mơdêk cheăng kâ rêh ối pơlê pơla ƀă liăn ngân tơnêi têa hơnăm 2022, túa pơkâ mơnhông mơdêk cheăng kâ rêh ối pơlê pơla hơnăm 2023; liăn ngân tơnêi têa ƀă túa pơkâ xing xoăng liăn tơnêi têa hơnăm 2023; klêi kơ’nâi pêi pro túa pơkâ ‘no liăn cheăng tơdjuôm hơnăm 2022; tiô tối hdrối túa pơkâ ‘no liăn cheăng tơdjuôm hơnăm 2023.

VOV/Tơplôu: Katarina Nga