VOV4.XơĐăng - Kơxo lơ 20/7, Pơlê kong kân Hồ Chí Minh hiăng mơhá hên kơxô̆ liăn 150 rơtuh liăn ăm Nguyễn Việt Phong hok tro lâm 12, hngêi trung râ má pái chuyên Lê Hồng Phong, 1 tung 4 ngế hok tro châ kâ pro mêa a hneăng tơ’noăng Olympic Hóa học lâp plâi tơnêi hơnăm 2022. Pôa Nguyễn Văn Hiếu, Ngế pơkuâ ngăn hnê hriâm ƀă hnê mơjiâng tuăn ngôa rơkê Pơlê kong kân Hồ Chí Minh ăm ‘nâi, hiăng ton ing nah nôkố Pơlê kong kân Hồ Chí Minh nếo ai hok tro châ điêm hên môi tiah mê.

Kố cho ki mơ-eăm dêi o xuân ing nôu pâ, hngêi trung ƀă thái cô hiăng tơmâng hnê khât ƀă ing tuăn ngôa rơkê tơná o. Pôa Hiếu púi vâ Nguyễn Viết Phong pơtối rak vế ki rơkê dêi tơná vâ hriâm klêi tơdroăng púi vâ, pleăng hnoăng tơná hên tâ ăm pơlê kong kân ƀă ăm tơnêi têa.

Nguyễn Viết Phong cho môi tung mâu ngế hok tro ki apoăng châ xo liăn mơhá kơnâ châ 200 rơtuh liăn ki ăm hok tro, sinh viên châ kâ pri mê tung mâu rôh tơ’noăng Olympic lâp plâi tơnêi. Hneăng tơ’noăng Olympic Hóa học lâp plâi tơnêi (ICho) 2022 châ tơkŭm po a kong têa Sinuâ. Khu tơ’noăng Việt Nam veăng lăm tơ’noăng ai 4 ngế, tŭm 4 ngế mê xuân châ kâ pri mêa.

Gương tơplôu ƀă tơbleăng