Ƀă châ kuăn pơlê loi tơngah ƀă ivá pêi cheăng rơkê, pôa hiăng ai hên tơdroăng veăng kum mơjiâng pơlê kro mơdrŏng.

Tung mơjiâng thôn pơlê nếo, pơlê Puih Duch, cheăm Ia Der, tơring Ia Grai, kong pơlê Gia Lai rơtế ƀă kăn ƀô̆ cheăm, pơlê kơhnâ hnê tối, mơhnhôk Kuăn pơlê pro troăng, mơdâ hdrê loăng plâi pro kơnâng ngiât, mơdêk tơ’noăng pêi chiâk, tê mơdró rơkê, mơhnhôk pro kro mơdrŏng tơxâng ƀă ivá tơná. Ƀă mâu tơdroăng cheăng pêi ki pơxúa, ối a pơlê Jut 2 pôa châ hên kuăn pơlê nhoăm pâ ƀă hriâm ƀối.

Pôa Ksor Du, kuăn pơlê Jut 2 hơ’muăn: Hơnăm 2017, pơlê Puih Duch tối mâu tơdroăng troh kuăn pơlê hiăng châ tơnêi têa kum 1,3 rơtal liăn vâ mơjiâng troăng xŏn lối 1,3 km. Krâ pơlê hiăng mơhnhôk hên vâi krâ nhŏng o pơlê tung pơlê pleăng dêi tơnêi pro troăng, rơtế ƀă dêi rơpó veăng rơtế mơjiâng thôn pơlê, tơná krâ pơlê pleăng môi iâ tơnêi dêi rơpŏng hngêi vâ mơjiâng troăng tung pơlê.

Kơnôm môi tuăn hlối mơ-eăm dêi kăn ƀô̆ ƀă kuăn pơlê, troh nôkố, pơlê hiăng ai môi to troăng lĕm. Troăng ƀê tong hiăng kum kuăn pơlê châ tơ’lêi prôk lăm, tơ’lêi chơ tơmeăm pêi lo ing chiâk deăng. Pơlê Jut 2 ôh tá xê to pê klêi mâu pơkâ mơjiâng thôn pơlê nếo ki châ rah xo pơlê mơjiâng tiô túa mơjiâng thôn pơlê nếo, vâ mâu pơlê ki ê tung cheăm veăng lăm pôu ngăn hriâm tâp. Pôa Ksor Du, tối:

“Tối ‘na tơdroăng djâ troăng dêi pơlê Puih Duch, kuăn pơlê ngế ki lâi xuân pâ nhoăm. Krâ pơlê cho mơnhế ki đi đo djâ troăng a hdrối, mơhnhôk kuăn pơlê mơ-eăm tung tơdroăng pêi cheăng kâ mơdêk tơdroăng rêh ối ƀă mơnhông pơlê pơla rế ton rế lĕm tâ, kuăn pơlê a kố ngế ki lâi xuân tơmâng tiô rơkong krâ pơlê ƀă đi đo rêh ối tiô troăng lĕm krâ pơlê’’.

Krâ pơlê Puich Duch hdrối nah pêi hên hnoăng cheăng pơkuâ pêi a cheăm mê cho: Pro kăn hnê ngăn Vi ƀan cheăm Ia Der; Ngế pơkuâ kŏng an cheăm; kăn hnê ngăn Chi ƀô̆ ƀă nôkố pêi hnoăng cheăng pro kăn hnê ngăn Măt trâ̆n,  cho ngế kuăn pơlê pâ nhoăm dêi pơlê Jut 2. Cho môi ngế đảng viên, pôa Puih Duch đi đo mơhno hnoăng cheăng pêi cho “tíu tơdjêp”, mơhno mâu troăng rơhlâ luât dêi Đảng ƀă tơnêi têa troh ƀă kuăn pơlê.

Pôa Puih Duch tối:

“A cho tíu tơdjêp, kuăn pơlê ối loi nhoăm kơ á mê a ối pêi. Mâu troăng rơhlâ, luât pơlâ dêi Đảng, Tơnêi têa mê á xuân rĕng hnê tối ăm kuăn pơlê vâ pro ti lâi tơdroăng rêh ối rế ton rế tơƀrê, phâi tơtô tâ, pơlê rế ton rế xông tơƀrê tâ. Thăm nếo kuăn pơlê ôh tá chiâng tơmâng khu ‘mêi pơlông djâ pro tơdroăng ki tơklâ dêi rơpó, rơtế amê hngêi ki lâi kal ăm dêi kuăn ‘nĕng hriâm tŭm vâ hlê rơkê, ing mê mơjiâng pơlê pơla tơnêi têa kro mơdrŏng’’.

Pôa Siu Hnit, Kăn phŏ hnê ngăn Vi ƀan cheăm Ia Der, ăm ‘nâi: Ƀă tơdroăng môi tuăn, pôa Puih Duch đi đo djâ troăng tung mâu tơdroăng mơhnhôk, pêi cheăng dêi pơlê, hlối tơrŭm ƀă khu cheăng kal kí a pơlê cheăm, mơhnhôk kuăn pơlê pêi tro mâu troăng rơhlâ, luât dêi tơnêi têa. Tung mê, ki tơƀrê má môi tung tơdroăng hnê tối mâu tơdroăng pơkâ: “Rêh ối lĕm ‘na châ tro ‘na mơhúa”  mơjiâng thôn pơlê nếo; rế pa ai ki rĕng xo dêi rơpó tá hâi tro hơnăm, lơ xo dêi rơpó ối pơdjuôm môi mơheăm, môi hdrông hdrê; mơnhông cheăng kâ tung rơpŏng hngêi.

“Đảng viên Puih Duch pơlê Jut 2 cho ngế kuăn pơlê pâ nhoăm, đi đo hnê troăng rơhlâ dêi Đảng Luât tơnêi têa. Mâu rôh hôp, pôa xuân chêh tŭm mâu tơdroăng klêi mê, hnê ăm kuăn pơlê tung pơlê ‘na mâu tơdroăng cheăng kâ, hnê hriâm, kring gak tơniăn pơlê pơla cheăm êng tíu tơkăng kong, veăng ‘no hnoăng pêi cheăng kum mâu cheăm ki xơpá pêi châ tiô pơkâ ‘na mơjiâng thôn pơlê nếo. Pôa cho ngế ki djâ troăng lĕm vâ kuăn pơlê pâ nhoăm’’.

Ia Grai cho tơring tơkăng kong, ai 13 to cheăm, pơlê kân ƀă 150 to thôn pơlê, tôh kơphô̆, tung mê, ai 92 to pơlê kuăn ngo. Mâu hơnăm hdrối, mâu krâ pơlê, kăn thôn ƀă mơngế kuăn pơlê pâ nhoăm hiăng ai hnoăng veăng ‘no kơhnâ khât tung tơdroăng veăng tơleăng mơnhên mâu tơdroăng  ‘na cheăng kâ–rêh ối, mơjiâng tơdroăng rêh ối mơhno túa lĕm tro, tơniăn kring gak pơlê pơla, cheăm bêng, rak tơniăn ƀă pơtối rak túa lĕm tro hdroâng kuăn ngo, pêi pro tiô tơdroăng tơrŭm môi tuăn mâu hdroâng kuăn ngo.

Pôa Trương Thế Vinh, ngế pơkuâ ƀơrô kuăn ngo tơring Ia Grai, tối:

“Pôa Puih Duch cho ngế ki djâ troăng lĕm dêi kăn ƀô̆ Măt trâ̆n, pôa đi đo pê klêi hnoăng cheăng châ pơcháu, malối pôa pơtối pêi hnoăng cheăng cho tiu ki tơdjêp vâ hnê tối mơhnhôk kuăn pơlê tung pơkâ dêi tơnêi têa tung mơnhông cheăng kâ rêh ối kơpong hdroâng kuăn ngo, tung mê ai tơdroăng pêi tiô pơkâ vâ kơdroh rĕng xo on veăng tá hâi tro  hơnăm, lơ ối pơdjuôm môi mơheăm môi hdrông hdrê tung kơpong hdroâng kuăn ngo, malối cho tơdroăng cheăng ‘na kuăn ngo. Tung pola pêi cheăng mê ngin xuân ‘nâi hnoăng cheăng pêi dêi pôa ƀă kuăn pơlê a cheăm”.

Ƀă mâu hnoăng veăng ‘no dêi tơná, pôa Puih Duch hâk tơngăm châ hên kuăn pơlê xo Ƀâng khĕn kơdeăn, hlá mơ-éa khĕn kơdeăn dêi rêm râ sap tíu xiâm tơnêi têa troh kong pơlê. Achê kố, khế 9/2022, pôa hâk tơngăm châ Kăn xiâm hnê ngăn kong pơlê Gia Lai diâp Ƀâng kơdeăn khĕn xua hiăng ai hnoăng pêi cheăng kơhnâ tung hriâm mơjiâng khu tơrŭm môi tuăn hdroâng kuăn ngo a kơpong kuăn pơlê ối.