VOV4.Xơ Đăng - Hâi lơ 5/8, a Pơlê kong kơdrâm Đà Lạt (Lâm Đồng), Khu chêh hlá tơbeăng Việt Nam tơkŭm po Rôh hôp mơgêi hnoăng cheăng tŏng kum mâu hlá tơbeăng ki châh rơkê hneăng hơnăm 2016 – 2020, tơbleăng tơdroăng tŏng kum hneăng hơnăm 2021 – 2025. Vâ chê 150 ngế cho hô̆i viên, kăn pơkuâ mâu Khu chêh hlá tơbeăng dêi 19 to kong pơlê kơpong peăng Tơdế tơnêi têa ƀă Tây Nguyên veăng ai mâ.

Vâ pơtối pêi pro châ tơƀrê mâu tơdroăng tŏng kum mâu hlá tơbleăng ki chêh rơkê hneăng hơnăm 2021 -2025 tiô pơkâ 558 dêi Ngế pro xiâm hnê ngăn Chin phuh, rôh hôp hiăng mơdoh hên chôu tơpui, tối leăng ƀă tối hên tơdroăng ki tơpui tối ‘na  tơdroăng đề tài châ mơhnhôk ƀă tơdroăng ki tơtro ƀă tơdroăng ki pêi cheăng; tŏng kum tung tơdroăng ki ‘mâi mơnhông ‘na tơdroăng cheăng, mơdêk ki rơkê tung hnoăng cheăng ăm mâu khu ki chêh hlá tơbeăng tung pơla pêi cheăng; mơdêk ki rơkê dêi mâu hlá tơbeăng ki chêh dêi kơ koan chêh hlá tơbeăng.

Pơtối mơdêk tŏng kum mâu hlá tơbeăng ki chêh rơkê 

Tơpui a rôh hôp, pôa Nguyễn Đức Lợi, kăn phŏ hnê ngăn Khu chêh hlá tơbeăng Việt Nam tối nhên, tơdroăng kố kô pơtối mơdêk hnoăng cheăng tŏng kum ‘na tơdroăng ki chêh hlá tơbeăng ƀă kơxô̆ liăn ‘no hên tâ, tung mê tơkŭm mơdêk ki rơkê cheăng, hnoăng cheăng dêi chêh hlá tơbeăng dêi mâu ngế tung khu.

Katarina Nga tơplôu ƀă tơbleăng