Hâi lơ 4/8, a Hà Nội, pôa Tô lâm Kăn xiâm pơkuâ  ngăn Đảng troh veăng leh ƀă tối tơbleăng a rôh trâm mâ mâu ngế pêi cheăng kơhnâ rơkê  tung tâi tâng mâu lêng Kŏng an kuăn pơlê veăng Hôp tơ’noăng “Xua kring tơniăn Tơnêi têa” rôh má 9.

Kăn xiâm pơkuâ ngăn Đảng rơrêk briê lo têa mâ, tơmâng xo  ƀă ƀă mâu ngế ki hiăng hlâ, rong râ tung pơla pêi hnoăng cheăng; mâu kăn ƀô̆, mâu lêng hmâ plâ rơxông ƀă tơdroăng tơplâ ƀă khu ‘mêi ai xôi, khu tê mơdró ma tŭi ƀă hên tơdroăng xâu rơ iô, mâu kăn ƀô̆, mâu lêng ki pleăng hnoăng tơná, lăm pêi cheăng a mâu cheăm tíu tơkăng kong, hơngế hơngo; mâu lêng ôh tá xâu pá puât on chếo, têa mơhiu vâ tŏng kum mơngế, kum tơmeăm khoăng; mâu ngế ‘măn pakĭng tơdroăng hơniâp krê dêi tơná  vâ pêi hnoăng cheăng pơcháu, kring vê tơdroăng rêh ối hơniâp lĕm ăm kuăn pơlê.

Pôa Tô Lâm kăn xiâm pơkuâ ngăn đảng pơkâ thế  pơtối tơbleăng pêi tơƀrê tơdroăng mơhnhôk tâi tâng kuăn pơlê kring vế tơniăn Tơnêi têa; khê̆n kơdeăn, pơ eăng, po rơdâ rế ai hên mơngế pêi cheăng lĕm, djâ troăng ahdrối  “mơngế lĕm, pêi cheăng lĕm” tơbâ hiâm mơno hâk tơngăm, pơtối rak vế pêi pro tơdroăng tơplâ khên tơnôu dêi kăch măng,...pro xiâm mơnhôk rế ai kăn ƀô̆, mơhnhôk hiâm mơno mâu kăn ƀô̆, mâu lêng ôh tá la lâi pơtê hriâm pât, ‘no ivá tơ’noăng, mơ-eăm pê klêi tơdroăng kring vế pơlê pơla, mơjiâng khu lêng Kŏng an  kuăn pơlê krúa lĕm, rơdêi, pêi cheăng kơhnâ rơkê, ƀeăn tiô túa nếo nôkố, veăng mơjiâng ƀă kring vế tơnêi têa tung tơdroăng nếo nôkố.

Rôh kô, pôa Tô Lâm Kăn xiâm pơkuâ ngăn Đảng  ƀă Ngế xiâm pơkuâ khu xiâm Kŏng an Lương Tam Quan hiăng hbru tơmeăm  ƀă mâu tơdroăng ki ai khât tung khu lêng Kŏng an nhân dân ƀă ki vâ tối cho khu lêng kring tơniăn a pơlê cheăm bêng.