Tung hâi lơ 28/9, hên tíu tung kong pơlê ai kong mêi kân, ai tíu 'nâ kong mêi kân ó. kơmăng hâi lơ 28/9, mâu cheăm, bêng tung kong pơlê Lâm Đồng pơtối ai kong mêi, kơxô̆ kong mêi tâi tâng sap ing 20- 40mm, ai tíu 'nâ lối 50mm.

Kong mêi kân pro rế hên tơdroăng ki tơ'lêi tro têa lân lu a mâu têa kroăng, têa krông ki kŭn; tơhnah tơhnâp tơnêi a kĭng ngo, troăng kơ'vĕng kơ'vŏng, kĭng troăng ƀă mâu troăng prôk. Kơ koan ngăn 'na hyôh kong prâi tối pơtâng 'na têa lân lu, tơnêi tơhnah tơhnâp mơni kô pro ôh tá tơniăn troăng prôk, tơdjâk troh tơdroăng prôk lăm, pro tơ'nhiê tơmeăm khoăng ƀă pro ôh tá tơniăn ăm kuăn pơlê.