Pơtối tơdroăng Hneăng hôp má 4, Kuô̆k hô̆i hneăng má 15, hâi lơ 7/11 Kuô̆k hô̆i pơxiâm mot tung măng tĭng pêi cheăng má 3. Ki xiâm tung măng tĭng pêi cheăng cho Kuô̆k hô̆i tơpui tơno ‘na hnoăng cheăng hbrâ mơdât mâu ngế ki pro xôi ƀă pro xôi luât; hnoăng cheăng pêi pro tơdroăng xôi; hnoăng cheăng hbrâ mơdât kâ kơluâ liăn ngân hơnăm 2022.

Môi tơdroăng ki kal ki ê cho Kuô̆k hô̆i tơpui ‘na kơxop hlá mơ-éa pơkâ dêi Kuô̆k hô̆i ‘na xúa rôh tơƀrê pơxâu phâk luât ƀă kăn ƀô̆, kong chưk, viên chưk ƀă tơdroăng pêi pro luât lăm ngi kong têa ê, mot tung tơnêi têa pin dêi kuăn pơlê Việt Nam tơdjâk troh tơdroăng kal “tíu kot mâ” a hô̆ chiếu. Tung măng tĭng pêi cheăng, Kuô̆k hô̆i xuân tơpui ‘na: kơxop hlá Luât Khu pêi cheăng tơrŭm ki ‘mâi hơ’lêh; kơxop hlá mơéa Luât hbrâ kring tơniăn; kơxop hlá mơ-éa Luât Rak vế hnoăng pơxúa dêi mâu ngế ki roê xúa tơmeăm ki ‘mâi hơ’lêh; kơxop hlá mơéa Luât chêh ngăn tung điê̆n tưh ki ‘mâi hơ’lêh, kơxop hlá mơ-éa Luât Yă ki ‘mâi hơ’lêh ƀă kơxop hlá mơéa luât tơbriât tê kế tơmeăm khoăng ki ‘mâi hơ’lêh.