Drêng troh apoăng hơneăm nếo 2023, pôa Phạm Minh Chính, Ngế pro xiâm hnê ngăn tơnêi têa nếo pơxiâm tơbleăng mơjiâng 12 tơdroăng tơkêa bro cho tung tơdroăng tơkêa bro ‘no liăn mơjiâng troăng kân tơdrăng sap peăng Kơnhŏng - troh peăng Hdroh peăng Mâ hâi lo. Tơdroăng tơkêa bro ai tâi tâng xŏn 729 km tơkâ luâ 12 to kong pơlê, pơlê kong kân mê cho pơla: Hà Tĩnh troh Quảng Trị; Quảng Ngãi troh Nha Trang; sap Cần Thơ troh  Cà Mau, tâi tâng kơlo liăn ‘no mơjiâng pro dâng 147.000 rơtal liăn.

Tơdroăng tơkêa bro châ klâ pro 12 tơdroăng tơkêa bro chiâng tơdroăng mơjiâng pro krê xêh, vâ tối kô pro klêi hơnăm 2025 ah ƀă kố ăm xúa sap hơnăm 2026. Troh nôkố, tíu mơjiâng pro 12 tơdroăng tơkêa pro mê hiăng châ pơcháu 70% ai tiô púi vâ  pơxiâm mơjiâng pro. Vâ pro klêi pơkâ troh hơnăm 2025 tơdjêp ƀă mâu troăng kân sap Lạng Sơn troh Cà Mau, pôa Phạm Minh Chính, Ngế pro xiâm hnê ngăn Chin phuh pơkâ thế Khu xiâm ngăn troăng prôk tơkŭm hnê ăm mâu khu rak ngăn tơdroăng tơkêa bro, hnê séa ngăn ƀă mâu khu mơjiâng pro pơtối rak vế ki môi tuăn ai hnoăng kân tung pêi cheăng, mơhnhôk tăng mơngế khu pêi cheăng, hbrâ kơmăi mok ki lĕm nếo nôkố, mơjiâng pơkâ, troăng rơhlâ mơjiâng pro tro tiô khoa hok, tơniăn pơxúa, tơƀrê.