Kơxo lơ 5/7, Hô̆i đong kong pơlê Gia Lai tơkŭm po Hneăng hôp má pái, hneăng má XII, hneăng hơnăm 2021 – 2026. Tiô tối hdrối Hneăng hôp kô tơkŭm po sap ing hâi 5 troh tâi hâi lơ 7/7, tơbleăng pêi pro 2 pơkâ ‘na mơngế pêi cheăng ƀă séa ngăn, tơbleăng ăm pêi pro 22 pơkâ ki tơdjâk mâu tơdroăng mơ’no liăn cheăng tơnêi têa, cheăng kâ, rêh ối pơlê pơla a kong pơlê.

‘Na rah xo mâu ngế pêi cheăng, teăng mâ Vi ƀan kong pơlê Gia Lai, pôa Trương Hải Long, Kăn hnê ngăn Vi ƀan kong pơlê Gia Lai tơbleăng mơ-éa ‘na tơdroăng rah xo pôa Phạm Minh Trung, Kăn pơkuâ loăng pơlái kong kế ƀă kong pro pro kăn cheăng tung Vi ƀan kong pơlê. Tơdroăng châ tơƀrê klêi kơ’nâi rah xo hâi kơ’nâi mê, pôa Phạm Minh Trung hiăng châ rah xo ƀă kơxô̆ phĭu 62/63.

Tiô tối hdrối, tung hneăng hôp kố, Hô̆i đong kong pơlê Gia Lai kô séa ngăn 22 tơdroăng tơkêa bro pơkâ dêi Vi ƀan kong pơlê Gia Lai. Tung mê, ai hên tơdroăng tơkêa bro pơkâ ki kal, môi tiah: Hơ’lêh pơkâ mơ’no liăn cheăng tơnêi têa hơnăm 2023 kơxô̆ liăn ngân kong pơlê; ‘mâi rơnêu pơkâ mơ’no liăn cheăng tơnêi têa iâ hâi; hơ’lêh ki xiâm xúa kong hơ’lêh pơkâ ki ê vâ pro troăng kân troh a cheăm a tơring Kông Chro.

A pơlê kong kơdrâm Kon Tum, Hô̆i đong kong pơlê Kon Tum pơxiâm po rôh hôp má 5, hneăng má 12, hneăng hơnăm 2021- 2026. A rôh hôp, Hô̆i đong hnê ngăn kong pơlê Kon Tum kô séa ngăn, mâu tơdroăng cheăng dêi mâu kơ koan tiô pơkâ tơpui tơno, tối tơdroăng cheăng kâ-rêh ối 6 khế apoăng hơnăm, ‘nâi nhên troăng rơhlâ, tơdroăng cheăng pêi ki kal 6 khế mơ’nui hơnăm 2023 ƀă pơkâ mâu tơdroăng kal cho dêi râ kăn.

Po sap nôkố ta troh hâi lơ 7/7 rôh hôp má 5, Hô̆i đong hnê ngăn kong pơlê Kon Tum hneăng 12 , hneăng hơnăm 2021-2026 kô séa ngăn, pơkâ ƀă 32 tơdroăng kal dêi Vi ƀan kong pơlê a rôh hôp, tung mê, ai mâu luât pơkâ ki kal, mê cho: kơlo tŏng kum vâ pêi tơdroăng xing xoăng kuăn pơlê a mâu kơpong kong prâi pro ôh tá tơniăn, malối xơpá, tíu tơkăng kong, tíu kuăn pơlê prôk ối hmâng vâ, kơpong kong kân tung kong pơlê; xoăng liăn tŏng kum mơnhông pêi cheăng tơrŭm; ‘mâi hơ’lêh pơkâ pêi mâu tơdroăng pơkâ dêi tơnêi têa hơnăm 2022, 2023 ƀă tiô tối hdrối troăng rơhlâ pơkâ xing xoăng pơkâ ‘no liăn mơjiâng tơmeăm khoăng tơnêi têa hơnăm 2024.